Tikwal, m’ara nheddeṛ i lɣaci ɣef Yahwa, ţmesxiṛen fell-​aneɣ neɣ zeεεfen. M’ara neţwali annect-​a, nezmer a nebɣu a neḥbes ur nheddeṛ ara. Yella wasmi i k-​d-​teḍra akka i keččini?— Adlis Iqedsen yeḥka-​d ɣef yiwen ilemẓi i gḥemmlen aṭas Yahwa, lameεna qrib yeḥbes ur iheddeṛ ara fell-​as. Ilemẓi-​yagi isem-​is Irmiya. Eyya-​d a nẓer menhu-​t.

Yiwen wass, Yahwa iḍleb-​as i Irmiya ad iweṣṣi medden akken ur xeddmen ara ayen n diri. D ayen i s-​iweεṛen mliḥ i Irmiya. Irmiya yugad. Yenna-​yas i Yahwa: “Ur ẓriɣ ara d acu ara sen-​iniɣ. Nekk bezzaf i meẓẓiyeɣ.” Meεna, Yahwa yerra-​yas-​d: “Ur ţţagad ara. A k-εiwneɣ.”

 Irmiya yebda ihi yeqqar i medden belli ad ţţuεaqben ma yella ur beddlen ara. Amek i twalaḍ, ad beddlen?— Xaṭi. Bdan ţmesxiṛen fell-​as yerna zeεfen mliḥ. Kra seg-​sen bɣan a t-​nɣen ula ţ-​ţimenɣiwt! Ar ɣur-​ek, amek i gḥuss iman-​is Irmiya?— Imi yugad, yenna: “Ur ţεawadeɣ ara yakk ad hedṛeɣ ɣef Yahwa.” Dɣa d ṣṣeḥ yeḥbes?— Ala, ur yeḥbis ara. Iḥemmel xilla Yahwa, daymi ur yezmir ara ad yeḥbes lhedṛa fell-​as. Ihi, imi ur yeḥbis ara, Yahwa iḥuder-​it.

Di lemtel, yiwet n tikkelt, kra n lεibad imcumen ḍeggren Irmiya ɣer lbir yeččuṛen d aluḍ. Ur yesεi ayen ara yečč wala ayen ara isew. Lεibad-​agi bɣan a t-​ǧǧen ad yemmet dinna. Lameεna, iεawen-​it Yahwa; ur yemmut ara!

Acu i d-​tḥefḍeḍ seg wayen yexdem Irmiya?— Γas akken tikwal yella yeţţagad, leεmeṛ yeḥbis lhedṛa ɣef Yahwa. M’ara teţmeslayeḍ ɣef Yahwa, yezmer lḥal kra n lεibad ad ţmesxiṛen fell-​ak neɣ ad zeεfen. Ahat aţ-​ţenneḥcameḍ neɣ aţ-​ţagadeḍ. Acu kan, ɣur-​ek aţ-​ţḥebseḍ ur theddṛeḍ ara ɣef Yahwa. A k-​iţεawan dima, akken i gεawen Irmiya.