Naq nokooʼaatinak chirix li Jehobʼa, wankebʼ nekeʼpoʼk malaj nokooʼeʼxseʼe. Peʼyaal naq inkʼaʼ sa naqeekʼa qibʼ naq nekeʼxbʼaanu aʼin? Ut maare naqakʼoxla: «Inkʼaʼ chik tinʼaatinaq chirix li Jehobʼa». Ma ak xaakʼul aʼin jun sutaq?... Li Santil Hu naxye naq wank jun li winq li kixkʼul aʼin, ut kachʼin chik ma kixkanabʼ aatinak chirix li Jehobʼa. Aʼan laj Jeremias. Qilaq kʼaru kixkʼul.

Naq saaj chaq laj Jeremias, li Jehobʼa kixye naq txik xyeebʼal rehebʼ li qas qiitzʼin naq teʼxkanabʼ xbʼaanunkil li maaʼusilal. Laj Jeremias kichalk xxiw. Ut kixye re li Jehobʼa: «Toj saajin chiʼus ut inkʼaʼ ninnaw kʼaru tinye rehebʼ». Li Jehobʼa kixye re: «Matxuwak, laaʼin tintenqʼanq aawe».

 Tojaʼ naq laj Jeremias kixye re li tenamit: «Wi inkʼaʼ nekeejal eenaʼlebʼ, teetoj eemaak». Ma keʼabʼink chiru?... Inkʼaʼ, wankebʼ keʼseʼenk re ut wankebʼ keʼpoʼk. Ut wankebʼ keʼxyal xkamsinkil. Chanru kireekʼa ribʼ laj Jeremias?... Kʼajoʼ naq kixuwak, joʼkan naq kixye: «Inkʼaʼ chik nawaj aatinak chirix li Jehobʼa». Ma kixbʼaanu? Ma kixkanabʼ aatinak chirix li Jehobʼa?... Inkʼaʼ. Saʼ xkʼabʼaʼ naq naxra chaq li Jehobʼa inkʼaʼ kixkanabʼ aatinak chirix. Joʼkan naq li Jehobʼa kikolok re chiruhebʼ li xikʼ nekeʼilok.

Saʼ jun kutan, jun chʼuut chi winq li xikʼ nekeʼilok, keʼxkut laj Jeremias saʼ nimla jul. Laj Jeremias kiʼok chi subʼeʼk saʼ sulul. Ut maakʼaʼ xwa rukʼaʼ. Keʼraj naq tkamq. Abʼan, ma kikoleʼk laj Jeremias? Heeheʼ, li Jehobʼa kixbʼaanu naq t-isiiq saʼ jul.

Saʼ li tzolom aʼin xqil naq laj Jeremias usta kixuwak maajunwa kixkanabʼ aatinak chirix li Jehobʼa. Kʼaru nakaatzol chirix laj Jeremias?... Maare tateʼxseʼe malaj teʼpoʼq naq tat-aatinaq chirix li Yos. Ut laaʼat maare tatxutaanaq malaj tatxuwaq. Abʼan maajunwa taakanabʼ aatinak chirix li Jehobʼa. Jultikoʼq aawe naq li Yos junelik tatxtenqʼa joʼ kixtenqʼa laj Jeremias.