Rĩmwe na rĩmwe andũ nĩ matũnyũrũragia kana magatũrakarĩra nĩ ũndũ wa kũmeera ũhoro wa Jehova. Ũndũ ũcio no ũtũme twende gũtiga kwaria ũhoro wa Ngai. Hihi wee nĩ ũrĩ waigua ũguo?— Bibilia nĩ ĩtwĩraga ũhoro wa mũndũ mũnyinyi weendete Jehova no aarĩ hakuhĩ gũtiga kwaria ũhoro wake. Eetagwo Jeremia. Ta reke twĩrute ũhoro wake makĩria.

Rĩrĩa Jeremia aarĩ mũndũ mũnyinyi, Jehova nĩ aamwĩrire akaanie andũ matige gwĩka maũndũ moru. Ũndũ ũcio warĩ mũritũ mũno harĩ Jeremia, na aarĩ na guoya. Eerire Jehova ũũ: ‘Niĩ ndiũĩ ũrĩa nguuga, tondũ ndĩ mũndũ mũnyinyi.’ No Jehova akĩmwĩra: ‘Tiga gwĩtigĩra. Nĩ ngũgũteithia.’

 Kwoguo Jeremia akĩambĩrĩria kwĩra andũ atĩ maaga gũtiga gwĩka maũndũ moru, nĩ mekũherithio. Nĩ ũgwĩciria ta andũ meekire ũrĩa Jeremia aameeraga?— Aca. Maamũnyũrũririe na makĩmũrakarĩra mũno. Amwe ao o na nĩ meendaga kũmũũraga! Ũgwĩciria Jeremia aaiguire atĩa?— Aaiguire guoya nginya akiuga: ‘Ndikwaria ũhoro wa Jehova rĩngĩ.’ No hihi nĩ aatigire?— Aca, ndaatigire. Nĩ eendete Jehova mũno ũũ atĩ ndangĩatigire kwaria ũhoro wake. Na tondũ Jeremia ndaatigire kwaria ũhoro wa Jehova, Jehova nĩ aamũgitĩire.

Kwa ngerekano, hĩndĩ ĩmwe andũ oru nĩ maaikirie Jeremia irima-inĩ iriku rĩrĩ na ndoro nyingĩ. Ndaarĩ na irio kana maĩ ma kũnyua. Andũ acio meendaga gũtiga Jeremia hau nĩguo akue. No nĩ aateithirio nĩ Jehova, kwoguo akĩaga gũkua!

Ũngĩĩruta ũndũ ũrĩkũ kuumana na kĩonereria kĩa Jeremia?— O na gũtuĩka rĩmwe na rĩmwe nĩ aaiguaga guoya, ndaatigire kwaria ũhoro wa Jehova. Rĩrĩa ũraaria ũhoro wa Jehova, andũ no makũnyũrũrie kana makũrakarĩre. No ũigue ũconokete kana wĩ na guoya. No ndũkanatige kwaria ũhoro wa Jehova. Hingo ciothe nĩ arĩgũteithagia, o ta ũrĩa aateithirie Jeremia.