Omafimbo amwe, ovanhu otashi dulika ve tu sheke eshi hatu va lombwele kombinga yaJehova. Osho otashi dulu oku tu ningifa tu kale twa hala okweefa po oku va lombwela kombinga yaJehova. Mbela omafimbo amwe osho ho kala u udite ngaho?— Ombibeli oya popya kombinga yomunyasha umwe oo a li e hole Jehova, ndele hanga a efe okupopya kombinga yaye. Edina lomunyasha oo oJeremia. Natu ke lihongeni shihapu kombinga yaye.

Eshi Jeremia a li omunyasha, Jehova okwa li e mu lombwela a ka londwele ovanhu va efe okulonga oinima ii oyo va li tava longo. Osho osha li shidjuu neenghono kuJeremia molwaashi okwa li a tila. Okwa lombwela Jehova a ti: ‘Kandi shi shii kutya ohandi ka tya shike. Ame okamatyona, inandi kula natango.’ Ndele Jehova okwa ti kuye: ‘Ino tila. Ame ohandi ke ku kwafela.’

 Onghee hano, Jeremia okwa li a hovela okulondwela ovanhu kutya ngeenge itava efa okulonga owii, Jehova ote ke va handukila. Ovanhu ova li ngoo mbela va ninga ngaashi Jeremia e va lombwela?— Hasho nandenande. Ponhele yaasho, ova li ve mu handukila nova li tave mu sheke. Vamwe ova li nokuli va hala oku mu dipaa. Mbela Jeremia okwa li e udite ngahelipi?— Okwa li a tila, nomolwaasho okwa ti: ‘Itandi ka popya vali kombinga yaJehova.’ Ndele mbela okwa li ngoo a efa okupopya kombinga yaJehova?— Hasho nandenande. Ina efa okupopya kombinga yaJehova shaashi okwa li e mu hole neenghono. Molwaashi Jeremia ka li a sholola, Jehova okwa li e mu amena.

Pashihopaenenwa, pomhito imwe ovalumenhu vamwe ovakolokoshi ova li va umbila Jeremia mondungu i yadi onhata. Ka li e na eshi ta li ile ta nu. Ovalumenhu ovo ova li va hala Jeremia a file mondungu oyo. Ndelenee Jehova okwa li a xupifa Jeremia.

Oshike we lihonga moshihopaenenwa shaJeremia?— Nonande Jeremia okwa li ha kala a tila omafimbo amwe, ina efa nande okuudifa kombinga yaJehova. Ngeenge oho udifa kombinga yaJehova, ovanhu vamwe otashi dulika ve ku sheke ile va kale ve ku handukila. Otashi dulika u kale wa fya ohoni ile wa tila. Ndele ino efa okupopya kombinga yaJehova. Ote ke ku kwafela alushe ngaashi ashike a li a kwafela Jeremia.