Піс кізілерге Иеговадаңар чоохтапчатсабыс, олар піске пірееде кӱлчелер алай тарынчалар даа. Аннаңар піс хорых парарға паза Худайдаңар чоохтабиныбызарға айабаспыс. Синнең чи, андағ ниме полған ма?~ Библияда Иеговаа хынған оолдаңар чоохталча. Пірсінде ол Иеговадаңар чоохтирын сала ла тохтадыбыспаан. Ол оолның ады Иереми́я. Аннаңар кӧп арах піліп алааң.

Иегова чиит Иеремияа кізілер хомай киректер идерге тохтатсыннар тіп чоохтирға чахаан. Ол тоғыс Иеремияа уғаа сидік пілдірткен, аннаңар ол хорых парған. Иеремия Иеговаа теен: «Мин чоохтанып оңнабинчам, мин уғаа чиитсім». Че Иегова ағаа нандырған: «Хорыхпа. Мин сағаа полыс пирем».

 Андада Иеремия, кізілер алыспазалар, Худай оларны хатығлир тіп чоохтап сыххан. Хайди сағынчазың, кізілер Иеремияның сӧстерін искеннер бе?~ Чох. Олар ағаа кӱлгеннер паза ағаа тың ӧкпеленібіскеннер. Піреелері аны ӧдірібізерге хынғаннар! Хайди сағынчазың, Иеремияа хорығыстығ полған ма?~ Ол хорых парып теен: «Мин Иеговадаңар паза чоохтабаспын». Иеремия, хорых парып, сынап тымыл парған ма?~ Чох. Ол Иеговаа тың хынған ӱчӱн, анынаңар чоохтирға хынған. Иеремия холын тӱзірбееннеңер Иегова аны арачылаан.

Пірсінде чабал кізілер Иеремияны тирең, палчах толдыра оймахсар тастабысханнар. Ағаа суғ даа, чиис тее пирбееннер. Иеремия анда ӧл парзын тіп, хынғаннар. Че Иегова Иеремияа тіріг халарға полыс пирген.

Иеремияның кӧзідімі сині нимее ӱгрет полар?~ Иеремия пірееде Иеговадаңар чоохтирға хорыххан даа полза, аннаңар чоохтирын тохтатпаан. Син піреезіне Иеговадаңар чоохтапчатсаң, анзы оларның кӧңнілеріне кірбес тее. Сағаа кӱлерге дее айабастар. Син уйадарзың даа алай сағаа хорғыстығ даа полар. Че Иеговадаңар чоохтирын пір дее тохтатпа! Худай Иеремияа полысхан, сағаа ідӧк полызар.