មេរៀនទី៩
យេរេមាមិនបានឈប់និយាយអំពីព្រះយេហូវ៉ា
ហេតុអ្វីមនុស្សខឹងនឹងយេរេមា?
ព្រះយេហូវ៉ាបានជួយសង្គ្រោះយេរេមា
ជួនកាលមនុស្សសើចចំអកដាក់យើងឬខឹងនឹងយើង ពេលយើងប្រាប់ពួកគេអំពីព្រះយេហូវ៉ា។ នេះអាចធ្វើឲ្យយើងចង់ឈប់និយាយអំពីព្រះ។ តើកូនធ្លាប់មានអារម្មណ៍បែបនេះទេ?— គម្ពីរបានប្រាប់យើងអំពីបុរសវ័យក្មេងម្នាក់ដែលស្រឡាញ់ព្រះយេហូវ៉ា តែគាត់ហៀបនឹងឈប់និយាយអំពីលោកតទៅទៀត។ គាត់ឈ្មោះយេរេមា។ សូមយើងរៀនថែមទៀតអំពីគាត់។
ពេលយេរេមានៅជាបុរសវ័យក្មេង ព្រះយេហូវ៉ាបានប្រាប់គាត់ថា គាត់ត្រូវព្រមានមនុស្សឲ្យឈប់ប្រព្រឹត្ដអំពើអាក្រក់។ នេះជាអ្វីដែលពិបាកណាស់ចំពោះយេរេមា ហើយគាត់ភ័យខ្លាច។ គាត់បានប្រាប់ទៅព្រះយេហូវ៉ាវិញថា៖ ‹ខ្ញុំមិនដឹងថាត្រូវនិយាយអ្វីទេ។ ខ្ញុំនៅក្មេងនៅឡើយ›។ ប៉ុន្ដែព្រះយេហូវ៉ាបាននិយាយថា៖ ‹កុំខ្លាចឡើយ ខ្ញុំនឹងជួយអ្នក›។
ដូច្នេះយេរេមាចាប់ផ្ដើមព្រមានមនុស្សឲ្យកែប្រែ។ បើពួកគេមិនកែប្រែទេ ពួកគេនឹងត្រូវទទួលទោស។ តើកូនគិតថាមនុស្សធ្វើតាមអ្វីដែលយេរេមាបាននិយាយទេ?— អត់ទេ។ ពួកគេខ្លះសើចចំអកដាក់គាត់ ហើយខ្លះទៀតខឹងនឹងគាត់យ៉ាងខ្លាំង។ មនុស្សខ្លះថែមទាំងចង់សម្លាប់គាត់ទៀត! តើកូនគិតថាយេរេមាមានអារម្មណ៍យ៉ាងណា?— គាត់ភ័យខ្លាច ហើយបាននិយាយថា៖ ‹ខ្ញុំនឹងមិននិយាយអំពីព្រះយេហូវ៉ាទៀតទេ›។ ប៉ុន្ដែ តើគាត់ពិតជាឈប់ទេ?— អត់ទេ គាត់មិនបានឈប់ទេ។ គាត់ស្រឡាញ់ព្រះយេហូវ៉ាខ្លាំងណាស់រហូតដល់គាត់មិនអាចឈប់និយាយអំពីលោកបានឡើយ។ ដោយសារយេរេមាមិនបានឈប់និយាយអំពីព្រះយេហូវ៉ា នោះលោកបានសង្គ្រោះជីវិតរបស់គាត់។
ជាឧទាហរណ៍ នៅពេលមួយ បុរសអាក្រក់ខ្លះបានបោះយេរេមាចូលក្នុងអណ្ដូងមួយដែលមានសុទ្ធតែភក់។ គាត់គ្មានអាហារឬទឹកទេ។ បុរសទាំងនោះចង់ទុកឲ្យយេរេមាស្លាប់នៅទីនោះ។ ប៉ុន្ដែដោយមានជំនួយពីព្រះយេហូវ៉ា គាត់បានរួចជីវិត!
តើកូនអាចរៀនអ្វីពីគំរូរបស់យេរេមា?— ទោះជាគាត់ភ័យខ្លាចនៅពេលខ្លះក៏ដោយ គាត់មិនបានឈប់និយាយអំពីព្រះយេហូវ៉ាទេ។ ពេលកូននិយាយអំពីព្រះយេហូវ៉ា មនុស្សប្រហែលជាសើចចំអកដាក់កូនឬខឹងនឹងកូន។ កូនប្រហែលជាខ្មាសគេឬភ័យខ្លាចទៀតផង។ ប៉ុន្ដែ កុំឈប់និយាយអំពីព្រះយេហូវ៉ាឲ្យសោះ។ លោកនឹងជួយកូនជានិច្ច ដូចលោកបានជួយយេរេមាដែរ។
