Saí ithangana, o athu a tu xonguena, mba ka uabhela kioso ki tu zuela nau ia lungu ni Jihova. Kiki, ki tu bhangesa ku kamba o vondadi ia kuzuela nau o Mak’â Nzambi. O kuila ua divuile kiá kiki?— O Bibidia i tu tangela ia lungu ni munzangala ua zolele kiavulu Jihova, maji kua kambele ngó bhofele, muéne keji mesena dingi kuzuela maka a lungu ni muéne. O dijina diê Jelemiia. Tu di longe ia lungu ni muéne.

Kioso Jelemiia kiexile munzangala, Jihova ua mu tumine ku dimuna o athu, phala kueha ku bhanga o ima ia iibha ia kexile mu bhanga. Kiki kia bhonzele kiavulu phala Jelemiia, mukonda muéne ua kexile ni uôma. Muéne uambela Jihova: ‘Eme ki ngijiia kuzuela. Ngi mona-ndenge hanji.’ Maji Jihova ua tambuijila: ‘Kana ku kala ni uôma. Nga-nda ku kuatekesa.’

 Mukonda dia kiki, Jelemiia ua mateka ku dimuna o athu kuila, eji ku a kaxtikala, se ene ka lungulula o ukexilu uâ ua iibha. O kuila o athu a bhangele ia a tendelesa Jelemiia?— Kana. Ene a mu xonguena, a dizangala né. Saí athu a mesenene ku mu jibha! Kiebhi kia divu Jelemiia?— Muéne ua kexile ni uôma, iu ua zuela: ‘Ki nga-nda kuzuela dingi o dijina dia Jihova.’ O kuila muéne ua bhuile o kuzuela o dijina dia Jihova?— Kana, ka bhuila mu kuzuela. Muéne ua zolele kiavulu Jihova, mukonda dia kiki, ka tenene kueha kuzuela ia lungu ni muéne. Mukonda Jelemiia ka bhuila mu kuzuela ia lungu ni muéne, Jihova ua mu bhulula.

Mu kifika, saí kizuua o maiala a iibha, a takula Jelemiia mu kixima kia kexile ni matóua. Muéne ka kexile ni kudia, mba menha. O maiala enhó, a mesenene kueha Jelemiia mu kididi kieniókio, phala muéne kufuá. Maji Jihova ua mu kuatekesa, iu ua tundu mu kididi kieniókio!

Ihi i u tena ku di longa ku phangu ia Jelemiia?— Sumbala saí ithangana muéne ua kexile mu kala ni uôma, maji muéne ka bhuila mu kuzuela ia lungu ni Jihova. Kioso ki uzuela ia lungu ni Jihova, nange o athu a ku xonguena, mba kia a iibhila. Nange u kala ni jisonhi, mba u kala ni uôma. Maji ku tokala ku bhuila mu ku zuela ia lungu ni Jihova. Muéne ua-nda ku kuatekesa mu ithangana ioso, kála kia kuatekesele Jelemiia.