Kimo kimye bantu betwambila byatama, nangwatu kwituzhingijila inge ke twi basapwile pe Yehoba. Kino kyakonsha kwitulengela kukeba kuleka kwamba pe Lesa. Nanchi ne obewa wakyumvwapo kala bino nyi?— Baibolo witubuulapo mwanyike wamulume umo watemenwe Yehoba, pano bino, wakebelenga kuleka kwamba pe aye. Jizhina janji wajinga Yelemiya. Twaya tufunde byavula pa uno mwanyike.

Yelemiya kimye kyo ajingatu mwanyike, Yehoba wamubuujile amba wafwainwe kujimunako bantu kuba’mba baleke kuba bintu byatama. Kuba bino kechi kwamupelejile Yelemiya ne, kabiji wachiine. Yelemiya wabuujile Yehoba amba: “Amiwa kechi nayuka kwamba ne, mambo nkijitu mwanyike.” Pakuba Yehoba wamwambijile’mba: ‘kuchina ne, mambo amiwa nkakukwasha.’

 Onkao mambo, Yelemiya watendekele kujimunako bantu kuba’mba inge babula kuleka kuba bintu byatama, Lesa ukebonauna. Ubena kulanguluka’mba bantu baubile bibambijile Yelemiya nyi?— Ine. Bamwambijilenga byatama ne kumuzhingijila bingi. Bamo bakebelenga ne kumwipaya. Walanguluka’mba Yelemiya waumvwine byepi?— Wachiine kabiji waambile’mba: ‘Kechi nkamba jibiji byambo bya Yehoba ne.’ Nanchi kya kine Yelemiya wikilekele kwamba byambo bya Yehoba nyi?— Ine, kechi wikilekele ne. Watemenwe bingi Yehoba kya kuba kechi wikilekele kusapwila byambo byanji ne. Kabiji na mambo a kuba Yelemiya kechi wikilekele ne, Yehoba watwajijile kumukwasha.

Kya kumwenako, kimye kimo banabalume bamo batama michima bamutayile Yelemiya mu mushima wazhika bingi mwajinga mateshi. Kechi wajinga na kajo nangwa mema ne. Bano banabalume bakebelenga’mba Yelemiya afwe. Pano bino, wapulukile mambo Yehoba wamukwashishe.

Wakonsha kufunjilako ka kwi Yelemiya?— Nangwa kya kuba Yelemiya bimye bimo waumvwanga moyo, bino kechi wikilekele kwamba pe Yehoba ne. Inge ke wambe byambo bya Yehoba, bantu bakonsha kukwambila byambo byatama nangwa kukuzhingijila. Wakonsha kumvwa bumvu nangwa kuchiina. Pano bino, kechi wafwainwa kuleka kwamba byambo bya Yehoba ne. Kimye kyonse Yehoba ukakukwashanga byonka byo akwashishe Yelemiya.