Ezak’e ntangwa, wantu bekutusevanga yovo kutufungila makasi vava tukubazayisanga mambu ma Yave. Ediadi dilenda kutufila mu yambula samuna mambu ma Nzambi. Nga walwakilwa kala kwa ngindu zazi?— Nkand’a Nzambi uyikanga toko dimosi diazolanga Yave, kansi wazola yambula samuna mambu mandi. E nkumbu andi Yeremiya. Yambula twalongoka diaka mayingi mu kuma kiandi.

Vava Yeremiya kakala toko, Yave wanzayisa vo kalukisa nkangu bayambula vanga mambu mambi. Ediadi diampasi diakala kwa Yeremiya kadi wonga kakala wau. Wavovesa Yave vo: ‘Kizeye dina mvova ko, kadi i nleke kwame.’ Kansi,  Yave wavova vo: ‘Kumoni wonga ko. Ikusadisa.’

Muna kuma kiaki, Yeremiya wayantika lukisa nkangu vo avo ke basobele ko, tumbwa betumbwa. Nga obenze vo nkangu walemvokela e mvovo mia Yeremiya?— Ve. Banseva yo kumfungila makasi. Akaka nkutu bavava kumvonda. Yeremiya aweyi kamona?— Wamona wonga yo vova vo: ‘Kisamuna diaka mambu ma Yave ko.’ Kansi, nga wayambula kikilu?— Ve, kayambula ko kadi watoma zolanga Yave. Muna kuma kiaki, kayambula samuna mambu mandi ko. Wau vo Yeremiya kayoya ko, Yave wantaninanga.

Kasikil’owu, lumbu kimosi wantu ambi batuba Yeremiya muna wulu diazala ye nteke. Kakala ye madia ko ngatu maza. Wantu awaya bazola sisa Yeremiya muna wulu kimana kafwila mûna. Kansi muna lusadisu lwa Yave, Yeremiya wavuluka.

Adieyi olenda longoka muna lusansu lwa Yeremiya?— Kana una vo ezak’e ntangwa wamonanga wonga, kayambula samuna mambu ma Yave ko. Vava osamunanga mambu ma Yave, wantu balenda kuseva yovo kufungila makasi. Olenda tokana yovo mona wonga. Kansi, kuyambula samuna mambu ma Yave ko. Yave okusadisa nze una kasadisila Yeremiya.