Shimbi impindi abantu balatutongaala neli balakalipa kani tulukubebako pali baYehova. Ici cingatulenga ukufwaya ukuleka ukulabila pali baLesa. Kani na webo ulingomfwepo ifyo?— Baibolo ililabiilepo pa musankwa uwatemenwe baYehova pano uwafwaile ukuleka ukulabila pali bo. Aali ni Jelemiya. Nga tusambililepo na fimbi pali ye.

Ili Jelemiya ali umwanice, baYehova balimwebele ati alyelelwe ukucenjesha abantu ati baleke ukucite’fibipile. Ici cali icikosele kuli Jelemiya, kabili alyumfwilo’mwenso. Alyebele baYehova ati: ‘Nshishipo ifyakulabila. Ndi mwanice lukoso.’ Pano baYehova balilabiile ati: ‘Witiina. Nakukofwako.’

 Popele Jelemiya alitatikile ukucenjesha abantu ati bakabapanika kani tabaalukilepo. Kani ulukulanguluka ati abantu balicitile ifi Jelemiya abebele?— Koku. Balimutongawile neli balikalipile. Bambi balukufwaya ne kumwipaya! Kani ulukulanguluka ati Jelemiya alyumfwile shani?— Alyumfwilo’mwenso, ne kulabila ati: ‘Nshikalabilapo libili pali baYehova.’ Kani mu cinenene alilekele ukulabila?— Koku, talekelepo. Alibatemenwe makosa baYehova ica kweba ati alifililwe ukuleka ukulabila pali bo. Kabili pakuti Jelemiya talekelepo, baYehova kabamupulusha.

Ku cakubwenako, imbi impindi bambi abalalume ababipile balimupoosele Jelemiya mu mukalo umwali amatipa aengi. Takwetepo ifyakulya neli menda. Abo abalalume balukufwaya ukusha Jelemiya mwenko’mo ati afwe. Pano baYehova kabamupulusha!

Findo ungasambililako kuli Jelemiya?— Nangaba ati alukumfwo’mwenso shimbi impindi, talekelepo ukulabila pali baYehova. Kani ulukulabila pali baYehova, cipale abantu bangakutongaala neli bangakalipa. Cipale ungomfwe’nsoni neli umwenso. Pano tekweshapo ukuleka ukulabila pali baYehova. Bakakofwako lyonse, koti ni fifilya bamofweleko Jelemiya.