Cimwi ciindi bantu balakalala akutuseka na katubaambila pali Yehova. Ici inga calengesha ayi tucileke kwaambila bamwi pali Lesa. Sa awebo wakanyumfwaawo ubo?— Baibo ilatwaambila pa mwanike umwi musankwa wakalinga kusuni Yehova sombi wakalinga kusuni kucileka kwaambila bamwi pali nguwe. Liina lyakwe wakalinga ngu Jelemiya. Atwiiye pali nguwe.

Jelemiya kaacili mwanike, Yehova wakamwaambila ayi acenjeshe bantu kucileka kucita shibiibi. Jelemiya wakaloonda mukwiinga, cakalinga ciyumu kucita boobo. Wakaambila Yehova ayi: ‘Nshicishiiwo kwaamba. Mukwiinga ndi mwanike.’ Lyalo Yehova wakamwaambila ayi ‘utaloondi. Ntookucafwa.’

Aboobo Jelemiya wakatalika kubacenjesha  bantu ayi na babule kwaaluka Yehova ulaakubapa mulandu. Sa utooyeeya ayi bantu bakacita nshakabaambila Jelemiya?— Sobwe. Bakamuseka akumukalalila abuumbi. Bamwi bakalinga kusuni akumucaya! Ino utooyeeya ayi Jelemiya wakanyumfwa buyani?— Wakaloonda akwaamba ayi: ‘Teshi nkaambewo tubili sha pali Yehova.’ Ono sa wakacileka?— Sobwe, taakwe kucilekawo. Wakalinga kusuni Yehova cakwaamba ayi taakwe kucileka kwaamba pali nguwe. Mukwiinga Jelemiya taakwe kucileka, Yehova wakamushitilisha.

Ku cakubonenaako, basankwa bamwi babiibi bakawala Jelemiya mumukalo umo mwakalinga matipa. Taakalinga kuciteewo shakulya nabi maanshi. Basankwa abo bakalinga kusuni ayi Jelemiya afwiteemo. Sombi Yehova taakwe kumulekelela ayi afwe!

Ino nciinshi nceenga weeya kucakubonenaako cakwe Jelemiya?— Nacibi kwaamba ayi cimwi ciindi wakalinga kuloonda, taakwe kucilekawo kwaamba pali Yehova. Awebo ndyootokwaambila bamwi pali Yehova, bantu inga bakuseka nabi kukukalalila. Inga waloonda nabi kunyufwa nsoni. Sombi toeelete kucileka kwaambila bamwi pali Yehova. Lyoonse ananookucafwa, bweenka mbwakacafwa Jelemiya.