Mpinji yikwawu antu atusehaña hela kutuhela neyi tunakuyishimwina nsañu yahosha hadi Yehova. Chumichi chikutuleñela tuleki kuhosha hadi Nzambi. Watiyahu dehi chamuchidiwu?— Bayibolu yatulejaña nsañu yakansi weyala wamukeñeli Yehova ilaña wakeñeleña kuleka kuhosha hadi Yehova. Ijina dindi diyi Yeremiya. Tudizenu kulonda tumwiluki.

Henohu Yeremiya wuchidi mukwenzi, Yehova wamulejeli kusoñamisha antu kulonda aleki kwila yuma yatama. Chumichi chamukalilili Yeremiya nankashi nawa chamutiyishili woma. Wamulejeli Yehova nindi: ‘Ami neluka kuhosha wanyi. Muloña nidi kansi.’ Ilaña Yehova wamulejeli  nindi: ‘Bayi wutiya womaku. Nukukukwasha.’

Yeremiya watachikili kusoñamisha antu nindi neyi akuhimpa wanyi akayibabesha. Wunatoñojoki neyi antu elili mwayilejeluwu kudi Yeremiya?— Inehi. Antu atachikili kumuseha nawa amuheleli. Amakwawu akeñeleña kumujaha. Wunatoñojoki neyi Yeremiya watiyili ñahi?— Watiyili woma nawa wahosheli nindi, ‘Hinakamutena cheñi Yehovaku.’ Mwalala walekeli kumutena?— Inehi. Wamukeñeli Yehova chakwila halekeli kuhosha hadi yenaku. Chineli Yeremiya halekeli kuhosha hadi Yehovaku, Yehova niyena wamukiñili.

Chakutalilahu, Yeremiya amumbilili muwina wakunama mwadiña malowa kudi amayala atama nyichima. Hadiña nayakudya hela menjuku. Awa amayala akeñeleña nawu Yeremiya yafwili muna muwina. Ilaña Yehova wamukwashili, wapulukili!

Chumanyi chiwukudizila kudi Yeremiya?— Hela chakwila watiyileña woma mpinji yikwawu, watwalekeluhu kuhosha hadi Yehova. Neyi hiwukuhosha hadi Yehova antu akutachika kukuseha hela kukuhela. Wukutiya nsonyi hela woma. Ilaña bayi wuleka kuhosha hadi Yehovaku. Wukakukwasha neyi chamukwashiliyi Yeremiya.