Ma ri jichkʼoji yo ntee o Jñaa e Jehová, bʼꞹnkʼo mbɇkuɇji ñe kʼo trjengegoji. Ma ri kjogꞹjikʼo, dya joo rga soji. Bʼꞹma ri manji: “Dya kja ra jichigo yo ntee o Jñaa e Jehová, kja, dya nee ra dyⱥrⱥji”. ¿Go bʼꞹbʼꞹ na paa kʼꞹ gui mbeñe ga kjanu?... Ne Biblia mama ke go mimi na bʼɇzo kʼꞹ mi chju̱u̱ Jeremías, angeze mi ⱥtⱥ e Jehová, pe go bʼꞹbʼꞹ na paa ma dya kja mi nee ro zopjꞹ yo ntee o jñaa e Mizhokjimi. Ra xørꞹji pjenga go tsjaa akjanu.

Ma mi trʼii e Jeremías, e Jehová go mbejñe ro ma xipji yo ntee kʼꞹ ro jyɇziji kʼo ma sʼoo kʼꞹ mi kjaji. Pe e Jeremías mi su̱u̱ ro zopjꞹ kʼo ntee, ngekʼua go xipji e Jehová: “Kja ri trʼigo, dya ri pa̱rgo ja rga zopjꞹ yo ntee”. Kjanu e Jehová go nrrꞹrꞹ: “Dya ri su̱u̱, nutsʼko ra pjøxkʼꞹ”.

 Nukʼua e Jeremías go xipji yo ntee: “Ma dya ri jyɇziji kʼo na sʼoo, ra zꞹkʼꞹji Mizhokjimi”. ¿Go ngotrʼpꞹji ñiʼi e Jeremías?... Iyo, kʼo ntee go nrrembeji ñe bʼꞹnkʼo me go mbɇkuɇji. ¡Bʼꞹnkʼo go manji ro mbøtrʼꞹji! ¿Gi pa̱rge ja gua zoʼo e Jeremías ma go mba̱ra̱kʼo?... Me go zu̱u̱, kjanu go mama: “Dya kja ra zopjꞹgo yo ntee o jñaa e Jehová”. Pe, ¿na kjuana dya kja go zopjꞹ yo ntee o jñaa e Jehová?... Iyo, dya go tsjaakʼo. E Jeremías mi nee ro tsjaa kʼo bi mama e Jehová, ngekʼua o sido o zopjꞹ yo ntee. E Jehová go mbøsʼꞹ, ngekʼua dya pje go tsjapꞹji kʼo ntee kʼꞹ mi ꞹmbꞹji.

Na nu paa go bʼꞹbʼꞹ bʼɇzo kʼo go ma pa̱ntrʼa̱ e Jeremías kja na meje kʼꞹ me ma je̱e̱. E Jeremías a ma ngibi kja kʼe meje, mi otrjo pje ro zii. ¡Kʼo bʼɇzokʼo, mi neji ke ro nrru̱u̱ e Jeremías kja kʼe meje! Pe, ¿go nrru̱u̱ e Jeremías? Iyo, nange e Jehová o tsjapꞹ ro ngꞹsꞹji kja kʼe meje ja mi oʼo.

O bʼꞹbʼꞹ paa ma go zu̱u̱ e Jeremías, pe go sido go zopjꞹ yo ntee o jñaa e Jehová. ¿Pje nge kʼo ri pjechiji ma ri xørꞹji kʼo go tsjaa e Jeremías?... Ma ra ma jichiji o Jñaa e Mizhokjimi, ra bʼꞹbʼꞹ ntee kʼꞹ ra nrrengegoji o ra ꞹngꞹji. Bʼꞹma ra tsjeji o ra su̱ji. Pe, dya ra jɇziji ra zopjꞹji yo ntee o Jñaa e Jehová. Angeze ra mbøxkoji kʼua ja nzi ba mbøsʼꞹ e Jeremías.