Insita zimwi antu yakatusoweka nanti ukukalipa lino tukuyaneena vimwi pali Yeova. Cii cingatuleenga ukuti tutaaloonda ukulanda pali Yeova. Uzye watala uvwapo vivyo?— Muli Baibo mwaya ilyasi lya mulumendo umwi uwatemilwe sana Yeova, nomba, kwasiile sile panoono ukuti ate ukulanda pali Yeova. Izina lyakwe wali a Yelemiya. Leka tusambilile pali Yelemiya.

Lino Yelemiya wali umulumendo, Yeova wamupeezile umulimo wa kuneena antu ukuta ukucita ivintu iviipe. Umulimo uu wali ukome sana kuli Yelemiya, nupya uvwile intete. Wanenyile Yeova ati: ‘Ntaamanya ivyakulanda uku yantu. Nene mwance sana.’ Nomba Yeova wamunenyile ati: ‘Utuvwa intete. Ndaakwazwa.’

Lyene Yelemiya watandike ukuneena antu ukuti Yeova wali nu konoona antu  yaayo ndi yatatiile ukucita iviipe. Uzye ukwelenganya ukuti antu yuvwiliile vino Yelemiya wayaneenanga?— Awe. Yaatandike ukumusoweka alino yamwi yamusokiile sana. Yamwi yene yaalondanga nu kumukoma! Ukwelenganya ukuti Yelemiya uvwile uli?— Uvwile sana intete nu kulanda ati: ‘Ntalatala ndande pali Yeova nupya.’ Nomba, uzye Yelemiya watile ukulanda pali Yeova?— Awe foo, ataatiile. Watemilwe sana Yeova icakuti wafizilwe ukuta ukuvwanga pali aliwe. Nupya Yeova watwaliliile ukucingilila Yelemiya, pano Yelemiya ataatiile ukulanda pali aliwe.

Wakwe vino caali pa nsita imwi, aonsi yamwi aipe yaasumbiile Yelemiya umu cifula umwali sana amatipa. Yelemiya ataakweti ivyakulya nanti amanzi yakumwa. Aonsi yaaya yaalondanga ukuti Yelemiya afwile mumu kwene. Nomba, Yeova wamwavwilizye nu kumupususya!

I vyani vino ungasambilila kuli vino vyacitikiile Yelemiya?— Nanti cakuti Yelemiya uvwanga intete limwi-limwi, ataatiile ukulanda pali Yeova. Lino ukulanda pali Yeova, antu yangaakusoweka nanti sile ukusoka sana. Ungailola kwati watuzewana sana nanti sile ukuvwa intete. Nomba, kusi kwezya ukuta ukuvwanga pali Yeova. Alatwalilila ukukwazwa, wakwe vino wazwilizye Yelemiya.