Jet iien armej rej kajjirere kõn kõj im illu ippãd ñe jej kõnnaan ippãer kõn Jeova. Men in emaroñ kõm̦m̦an bwe en bõjrak ad kõn̦aan kõnnaan kõn Jeova. Em̦õj ke an wal̦o̦k men in ñan kwe?— Baibõl̦ ej kwal̦o̦k kõn juon l̦addik me ear yokwe Jeova ak ebaj wõt bõjrak an kõnnaan kõn Jeova. Etan l̦addik eo in Jeremaia, im jen kal̦apl̦o̦k ad katak kõn e.

Jeremaia ear dik wõt ke Jeova ear kõjerbale. Ta eo Jeova ear ba Jeremaia en tõn ba ñan armej ro? Jeova ear ba bwe en kõjjel̦ãik armej ro ñan bõjrak jãn aer kõm̦m̦ani men ko renana. Ear lukkuun pen men in ñan Jeremaia, im ear mijak. Ear ba ñan Jeova: ‘Ijaje in ba ta, kõnke ij dik  wõt.’ Ak Jeova ear ba: ‘Jab mijak, inaaj jipañ kwe.’

Jeremaia ekar ba ñan armej ro bwe Jeova enaaj kajeik er ñe rejjab bõjrak jãn aer kõm̦m̦ani men ko renana. Armej ro rar ke roñjake Jeremaia?— Rar jab. Rar kajjirere kõn e im lukkuun illu ippãn. Joñan, jet rar kõn̦aan m̦ane! Jeremaia ear ke mijak?— Aet. Joñan ke ear ba: ‘Iban bar kõnnaan kõn Jeova.’ Ak ekar ke bõjrak?— Ekar jab. Jeremaia ear jab bõjrak an kõnnaan kõn Jeova. Etke? Kõn an l̦ap an yokwe Jeova. Innem, Jeova ear kõjparok Jeremaia.

Juon iien, jet em̦m̦aan nana rar jolal̦l̦o̦k Jeremaia ñan ilowaan juon roñ em̦wilal̦ im pedkat. Ear ejjel̦o̦k kijen ak limen Jeremaia. Ri nana rein rar kõn̦aan bwe Jeremaia en mej ñan roñ eo. Ak Jeova ekar jipañ Jeremaia, im ekar jab mej!

Ta eo kwõmaroñ katak jãn Jeremaia?— Jej katak bwe jekdo̦o̦n ñe jet iien Jeremaia ear mijak ak ear jab bõjrak an kõnnaan kõn Jeova. Ñe kwõj kõnnaan kõn Jeova, armej remaroñ kajjirere kõn kwe im illu ippam̦. Im bõlen kwõmaroñ jook im mijak. Ak jab bõjrak jãn am̦ kõnnaan kõn Jeova kõnke aolep iien enaaj jipañ kwe, ãinwõt an kar jipañ Jeremaia.