Nguva jimweni vandhu vanotishora kana kuguma pa kunyangajwa ndisu patinobhuya navo ngo pamusoro pa Jehovha. Izvi zvingatiita kuti tiime kuvereketa ngo pamusoro pa Mwari. Iwewe wakambojizwa kudaroko here?— Bhaibheri rinonanga ngo pamusoro po mujaha umweni waida Jehovha asi wakadoima kuvereketa ngo pamusoro pake. Zina rake wainga Jeremia. Ngatende tijije zvizinji ngo pamusoro pake.

Jeremia paainga ari mujaha Jehovha wakamubvunja kuti angwaje vandhu kuti varegere kuita zvakashata. Izvi zvakanesa maningi kuna Jeremia, zve iyena wakathya. Iyena wakabvunja Jehovha kuti: ‘Andizvizivi zvo kunanga. Ndiciri mujaha.’ Asi Jehovha wakati: ‘Ucadothya. Ndicakubesera.’

 Ngo kudaro Jeremia wakatanga kungwaja vandhu kuti ivona vaizopanicwa kudari vakatama kucinja. Unorangarira kuti vandhu vakapurutana zvainanga Jeremia here?— Haiwa. Ivona vaitomushora kana kuguma pa kunyangajwa ndiena. Vamweni vakatogumira pa kuda kumuuraya! Unorangarira kuti Jeremia wakajizwa kudini?— Iyena wakathya wonanga kuti: ‘Narini andicavereketizve ngo pamusoro pa Jehovha.’ Asi iyena wakasiadi kamare here?— Haiwa, aazivi. Iyena waida maningi Jehovha zvokuti aazivi kukwanisa kuima kuvereketa ngo pamusoro pa Jehovha. Zve ngo kutama kwake kuregera, Jehovha wakaramba ecimubvikira.

Inga muezaniso, vanarume vokushata vhaza imweni vakakhandira Jeremia mu rindi rakajika raizara ngo matope. Iyena aacainga no cokuha nee cokumwa. Vanarume vayani vaida kusia Jeremia mondhomo kuti afe. Asi ngo besero ra Jehovha, iyena wakapona!

Ungajijenyi kubva ku muezaniso wa Jeremia?— Pikija nguva jimweni wakathya, Jeremia aazivi kuima kuvereketa ngo pamusoro pa Jehovha. Paunovereketa ngo pamusoro pa Jehovha, vandhu vangakushora kana kuguma pa kunyangajwa ndiwe. Iwewe kangaije ungatopseruka kana kutothya. Asi ucatombonyarara kuvereketa ngo pamusoro pa Jehovha. Iyena nguva jese acazokubesera, inga kubesera kwaakaitira Jeremia  kamare.