Omathimbo gamwe aantu ohaye tu sheke nenge ye tu geele uuna tatu popi nayo kombinga yaJehova. Shoka ohashi tu ningitha tu kale twa hala okweetha okupopya kombinga yaKalunga. Mbela omathimbo gamwe nangoye oho kala wu uvite ngawo?—  Ombiimbeli otayi tu lombwele kombinga yomulumentu gumwe omugundjuka ngoka e hole Jehova, ihe okonyala e ethe okupopya kombinga ye. Edhina lye oJeremia. Natu ilonge oshindji kombinga ye.

Jeremia sho a li omugundjuka, Jehova okwa li e mu tumu a ka londodhe aantu ye ethe okuninga iinima iiwinayi. Shoka osha li oshilonga oshidhigu kuJeremia nokwa li e shi tila. Jeremia okwa li a lombwele Jehova a ti: ‘Kandi shi shoka tandi ka popya. Oshoka ngame okamatyona kowala.’ Ihe Jehova okwa ti: ‘Ino tila. Otandi ku kwatha.’

 Onkee ano, Jeremia okwa li a tameke okulondodha aantu kutya otaya ka geelwa kuJehova ngele itaye etha okuninga iinima mbyoka iiwinayi. Mbela oto dhiladhila kutya aantu oya li ngaa ya ningi shoka ya lombwelwa kuJeremia?—  Aawe. Oya li ye mu sheke nenge ye mu geele. Yamwe oya li nokuli ya hala oku mu dhipaga. Mbela oto dhiladhila kutya Jeremia okwa li u uvite ngiini?—  Okwa li a tila e ta ti: ‘Itandi popi we nando kombinga yaJehova.’ Ihe mbela okwa li a sholola shili?—  Aawe, ina sholola. Jeremia okwa li e hole Jehova noonkondo, shoka she mu kwathele kee ethe okupopya kombinga ye. Jehova okwe mu hupitha, molwaashoka ina sholola.

Pashiholelwa, aalumentu yamwe aakolokoshi oya li nokuli yu umbile Jeremia melambo eleeleka lyu udha enono. Jeremia ka li e na iikulya nomeya. Aalumentu mboka oya li ya hala ya thige Jeremia melambo moka opo a se. Ihe kekwatho lyaJehova, okwa hupu.

Oshike to ilongo moshiholelwa shaJeremia?—  Nokuli nando omathimbo gamwe okwa li a tila, ka li e etha okupopya kombinga yaJehova. Uuna to popi kombinga yaJehova, otashi vulika aantu ye ku sheke nenge ye ku geele. Otashi vulika to ka kala wa sa ohoni nenge wa tila nokuli. Ihe ku na nando okweetha okupopya kombinga yaJehova. Jehova ote ke ku kwathela aluhe, ngaashi naanaa a kwathele Jeremia.