FAKAAKOAGA 9
Nakai Oti e Tutala ha Ieremia Hagaao ki a Iehova
Ko e ha ne vale e tau tagata ki a Ieremia?
Fakahao e Iehova a Ieremia
Falu magaaho ne vaiga po ke vale e tau tagata ki a tautolu ka tutala a tautolu ki a lautolu hagaao ki a Iehova. Maeke e mena nei ke fakaohooho a tautolu ke fakaoti e tutala hagaao ke he Atua. Kua manamanatu pihia nakai a koe?— Ne tala mai e Tohi Tapu ki a tautolu hagaao ke he fuata taane ne fiafia ki a Iehova ka e teitei oti e tutala haana hagaao ki a Iehova. Ko e higoa haana ko Ieremia. O mai la ke fakaako atu foki hagaao ki a Ieremia.
Magaaho ne fuata a Ieremia, ne tala age a Iehova ki a ia ke fano ke hataki e tau tagata ke fakaoti e taute mena kelea. Ne uka lahi e mena nei ki a Ieremia, ti matakutaku a ia. Ne tala age a ia ki a Iehova: ‘Nakai iloa e au e mena ke talahau. Ko e tama tote ni au.’ Ka e pehē a Iehova: ‘Aua neke matakutaku a koe. To lagomatai e au a koe.’
Ti kamata a Ieremia ke hataki e tau tagata, to fakahala a lautolu ka nakai hiki e tau puhala. Manatu nakai a koe to taute he tau tagata e tau mena ne tala age e Ieremia?— Nakai. Ne vaiga e lautolu a Ieremia po ke vale lahi a lautolu ki a ia. Ne manako foki falu ke tamate a ia! Fēfē la e logonaaga ha Ieremia he manatu e koe?— Ne matakutaku a ia ti pehē: ‘To ai liu au ke tutala hagaao ki a Iehova.’ Ka e fakalolelole nakai a Ieremia?— Nakai, ai fakalolelole. Ne fiafia lahi a ia ki a Iehova ti nakai maeke a ia ke oti e tutala hagaao ki a Iehova. Ha kua nakai fakalolelole a Ieremia, ne puipui e Iehova a ia.
Ma e fakatai, he taha mogo ne tuku he falu tagata kelea a Ieremia ke he luo hokulo ne puke he pelapela. Ne nakai fai mena kai po ke vala vai a ia. Manako e tau tagata na ke toka a Ieremia i loto ia ke mate. Ka kua lagomatai ai e Iehova, ti hao a ia!
Ko e heigoa haau kua fakaako mai he fakafifitakiaga ha Ieremia?— Pete he matakutaku a Ieremia he falu magaaho, ne nakai okioki a ia he tutala hagaao ki a Iehova. Magaaho ka tutala a koe hagaao ki a Iehova, liga vaiga he tau tagata a koe po ke vale a lautolu ki a koe. Liga mā a koe po ke matakutaku foki. Ka kia nakai oti e tutala hagaao ki a Iehova. To lagomatai tumau e ia a koe, tuga ni he lagomatai e ia a Ieremia.
