Адӕмӕн Йегови туххӕй ку фӕдздзорӕн, уӕд нӕбӕл еуӕй-еу хатт ходгӕ фӕккӕнунцӕ кенӕ ба нӕмӕ мӕстгун дӕр исунцӕ. Уой туххӕй нӕ, ӕвӕдзи, нӕбал фӕффӕндуй Йегови туххӕй дзорун. Дӕубӕл дӕр ескӕд уӕхӕн хабар ӕрцудӕй? ~ Библи дзоруй, Йегови ка уарзта, еу уӕхӕн ӕригон биццеуи туххӕй. Фал еухатт еци биццеуи нӕбал фӕндадтӕй Йегови туххӕй дзорун. Ӕ ном хундтӕй Йереми. Гъӕйдӕ Йеремий туххӕй фулдӕр базонӕн.

Йереми ма ӕригон ку адтӕй, уӕд ин Йеговӕ загъта, адӕмӕн дзорӕ, цӕмӕй сӕ лӕгъуз гъуддӕгтӕ ниууадзонцӕ, зӕгъгӕ. Еци гъуддаг искӕнун ин зин адтӕй ӕма фӕттарстӕй. Йереми Йеговӕн загъта: «Ӕз дзорунмӕ дӕр нӕ арӕхсун. Ӕз ма ӕригон дӕн». Фал ин Йеговӕ ба загъта: «Ма тӕрсӕ. Ӕз дин ӕнхус кӕндзӕн».

 Йереми адӕмӕн дзорун райдӕдта, сӕ лӕгъуз гъуддӕгтӕ ку нӕ ниууадзонцӕ, уӕд син Хуцау тӕрхон ке искӕндзӕй. Куд дӕмӕ кӕсуй, адӕм Йеремимӕ байгъустонцӕ? ~ Нӕ. Еуетӕ ибӕл худтӕнцӕ, иннетӕ ба имӕ мӕстгун кодтонцӕ. Кадӕртӕ ба ’й марунмӕ дӕр гъавтонцӕ! Куд дӕмӕ кӕсуй, Йеремийӕн ӕнцон адтӕй? ~ Е фӕттарстӕй ӕма загъта: «Ӕз нӕбал дзордзӕн Йегови туххӕй». Фал ӕцӕгӕйдӕр нӕбал дзурдта? ~ Нӕ. Йереми Йегови берӕ уарзта, ӕма ӕ бон н’ адтӕй Йегови туххӕй ма дзорун. Ӕма ’й е дӕр гъӕуай кодта.

Зӕгъӕн, еухатт еу лӕгъуз лӕг Йеремий арф лӕкъӕрдӕ къагъди ниггӕлста. Уордӕмӕ ин дзол ӕма дон лӕвардтонцӕ. Еци лӕги фӕндадтӕй, цӕмӕй Йереми уоми рамардайдӕ. Фал ин Йеговӕ банхус кодта, ӕма ’й къагъдӕй исистонцӕ.

Йеремий хабарӕй цӕбӕл ахур кӕнис? ~ Кӕд Йереми еуӕй-еухатт фӕттӕрсидӕ, уӕддӕр Йегови туххӕй ба алкӕддӕр дзурдта. Ду дӕр Йегови туххӕй ку дзорай, уӕд дӕбӕл еуӕй-еухатт ходгӕ дӕр кӕндзӕнцӕ кенӕ дӕмӕ мӕстгун дӕр исуодзӕнцӕ. Е дин, ӕвӕдзи, зин уодзӕй ӕма дзорун нӕбал ӕндеудзӕнӕ. Фал дӕ къохтӕ макӕд ӕруадзӕ ӕма Йегови туххӕй алкӕддӕр дзорӕ. Е ба дин ӕнхус кӕндзӕй, Йеремийӕн куд ӕнхус кодта, уотӕ.