Alsamohl doon leit fann macha ivvah uns adda even bays vadda vann miah shvetza zu si veyyich Jehova. Dess kann macha es miah shtobba vella shvetza veyyich Gott. Hosht du selayva so kshpiaht?— Di Bivvel shvetzt veyyich en yungah mann es leevi katt hott fa Jehova. Avvah, eah hott baut kshtobt shvetza zu anri leit veyyich Jehova. Eah hott Jeremia kaysa. Vella may lanna veyyich een.

Vo da Jeremia noch yung voah, hott Jehova een ksawt fa gay anri leit sawwa es si sella shtobba shlechti sacha du. Dess voah reeli hatt fa da Jeremia, un eah hott sich kfeicht. Eah hott ksawt zu Jehova: ‘Ich vays nett vass fa sawwa. Ich binn noch so yung.’ Avvah Jehova hott ksawt zu een: ‘Feich dich nett. Ich zayld dich helfa.’

 So, da Jeremia hott kshteaht di leit sawwa es si kshtrohft vadda zayla vann si nett shtobba shlechti sacha du. Denksht du di leit henn gedu vass da Jeremia ksawt hott?— Nay. Si henn fann gmacht ivvah een adda sinn reeli bays vadda. Samm henn even een doht macha vella! Vi denksht du es da Jeremia kshpiaht hott?— Eah hott sich kfeicht un hott ksawt: ‘Ich zayl nimmi shvetza zu anri leit veyyich Jehova.’ Avvah is sell vass eah gedu hott?— Nay, eah hott nett. Eah hott so feel leevi katt fa Jehova es eah hott nett kenna shtobba shvetza veyyich een. Jehova hott een sayf kalda koss da Jeremia hott nett kshtobt.

So vi ay moll, henn samm mennah da Jeremia inna deef moddich loch kshmissa. Eah hott nix katt fa essa adda drinka. Selli mennah henn vella da Jeremia doht macha. Avvah Jehova hott een kolfa un eah is viddah raus kumma!

Vass kansht du lanna funn da Jeremia?— Even vann eah sich alsamohl kfeicht hott, eah hott nett kshtobt shvetza veyyich Jehova. Leit mechta fann macha ivvah dich un fleicht bays vadda vann du si sawksht veyyich Jehova. Du mechtsht dich shemma adda even dich feicha. Avvah, du selayva nett shtobba shvetza veyyich Jehova. Eah zayld immah dich helfa, yusht vi eah da Jeremia kolfa hott.