سبق 9
یرمیاہ—بھیڑے لوکاں وچ اِک دلیر آدمی
لوک یرمیاہ نال اینے غصے چ کیوں نیں؟
خدا نے کجھ آدمیاں دے ذریعے یرمیاہ نُوں بچا لیا۔
جدوں اَسی لوکاں نُوں یہوواہ خدا دے بارے دسنے آں تے کدی کدی اوہ ساڈا مذاق اُڈاؤندے نیں یاں فیر غصے چ آ جاندے نیں۔ ایس کر کے شاید اَسی سوچیے کہ اَسی اَگے توں یہوواہ خدا دے بارے لوکاں نال گل نئیں کراں گے۔ کدی تواڈے نال وی اِنج ہویا اے؟— بائبل سانوں اِک آدمی دے بارے دسدی اے جیہڑا یہوواہ خدا نُوں بوہت پیار کردا سی۔ پر اِک وقت آیا جدوں اوہنے سوچیا کہ اَگے توں اوہ یہوواہ خدا دے بارے کوئی گل نئیں کرے گا۔ اوس آدمی دا ناں یرمیاہ سی۔ آؤ، اَسی یرمیاہ دی کہانی پڑھیے۔
جدوں یرمیاہ جوان سن تے یہوواہ خدا نے اوہناں نُوں کہیا کہ لوکاں نُوں دس کہ اوہ بھیڑے کم چھڈ دین، نئیں تے مَیں اوہناں نُوں سزا دَواں گا۔ یرمیاہ بوہت ڈر گئے تے اوہناں نُوں لگا کہ لوکاں نُوں ایہہ گل دسنا بوہت اوکھا اے۔ یرمیاہ نے خدا نُوں کہیا: یہوواہ خدا! میرے لئی لوکاں نُوں ایہہ دسنا بوہت اوکھا اے۔ مَیں تے حالے بچہ واں۔ پر یہوواہ خدا نے کہیا: یرمیاہ! نہ ڈر، مَیں تیری مدد کراں گا۔
یہوواہ خدا دی گل سُن کے یرمیاہ نُوں بوہت حوصلہ ملیا۔ ایس لئی اوہناں نے لوکاں نُوں یہوواہ خدا دا پیغام سناؤنا شروع کر دِتا۔ کیہہ لوکاں نے یرمیاہ دی گل منی؟— نئیں۔ اوہ یرمیاہ دا مذاق اُڈاؤن لگ پئے تے بوہت غصے چ آ گئے۔ کجھ لوک تے اوہناں نُوں جانوں ای مار دینا چاہندے سن۔ ذرا سوچو کہ یرمیاہ نُوں کیہہ محسوس ہویا ہووے گا؟— اوہ بوہت ڈر گئے۔ اوہناں نے کہیا: ہُن توں مَیں لوکاں نال یہوواہ خدا دے بارے کدی وی گل نئیں کراں گا۔ پر کیہہ یرمیاہ نے لوکاں نُوں خدا دے بارے دسنا چھڈ دِتا؟— نئیں۔ اوہ یہوواہ خدا نُوں ایناں پیار کردے سن کہ اوہ لوکاں نُوں یہوواہ خدا دے بارے دس دے رہے۔ یرمیاہ ہمت نہ ہارے۔ ایس لئی یہوواہ خدا نے اوہناں دی جان بچائی۔ پتہ اے کیویں؟
اِک واری کجھ بُرے آدمیاں نے یرمیاہ نُوں اِک کُھوہ وچ سُٹ دِتا۔ ایہہ کُھوہ بڑا ڈُونگھا سی تے چکڑ نال بھریا ہویا سی۔ اوتھے اوہناں کول کھان پِین لئی کجھ وی نئیں سی۔ اوہ آدمی چاہندے سن کہ یرمیاہ اوتھے بُھکھے پیاسے مر جان۔ یہوواہ خدا نے یرمیاہ دی مدد کیتی تے اوہناں نُوں بچا لیا۔
تُسی یرمیاہ دی کہانی توں کیہہ سکھیا اے؟— بھانویں کہ یرمیاہ کدی کدی ڈر جاندے سن پر فیر وی اوہ لوکاں نُوں یہوواہ خدا دے بارے دسدے رہے۔ جدوں تُسی دُوجیاں نُوں یہوواہ خدا دے بارے دسدے او تے شاید اوہ تواڈا وی مذاق اُڈاؤن یاں تواڈے نال غصے ہون۔ ایس کر کے شاید تُسی یہوواہ خدا دے بارے گل کرن توں شرماؤ یاں ڈرو۔ پر کدی وی یہوواہ خدا دے بارے گل کرنی نہ چھڈو۔ یہوواہ خدا نے یرمیاہ دی مدد کیتی تے اوہ تواڈی وی مدد ضرور کرے گا۔
ایہہ ایتاں پڑھو:
-
یرمیاہ 1:4-8؛ 20:7-9؛ 26:8-19، 24؛ 38:6-13