Utru ora jintis ta gozanu o paña raiba di nos ora ku no na papia ku elis aserka di Jeova. Kila pudi fasinu disanima i para papia ku jintis aserka di Jeova. Bu ciga ja di sinti asin? — Biblia falanu di un joven ku amaba Jeova, ma ku staba kuas pa para papia ku jintis aserka di Jeova. Si nomi i Jeremias. Gosi no na aprindi mas aserka del.

Oca Jeremias seduba inda joven, Jeova falal ki i dibi di avisa jintis pa para fasi mau kusas. Es seduba difisil dimas pa Jeremias, i staba ku medu. I fala Jeova: ‘N ka sibi ke ku N na fala jintis. Ami i mininu inda.’ Ma Jeova falal: ‘Ka bu tene medu. N na judau.’

 Asin Jeremias kumsa avisa jintis di kuma e pudi bin sedu kastigadu si e ka muda. Bu pensa kuma jintis fasi ke ku Jeremias fala elis? — Nau. E gozal i e paña raiba del dimas. Alguns te mesmu misti matal! Kuma ku bu pensa Jeremias sinti? — I sintiba medu i fala: ‘N ka na papia mas aserka di Jeova.’ Ma sera ki i para? — Nau, i ka para. I amaba Jeova ciu dimas, asin i ka pudiba para papia aserka del. Suma Jeremias ka disisti, Jeova salval.

Un bias, alguns omis mau bota Jeremias dentru di un fonti fundu ku teneba manga di lama. I ka teneba kumida nin yagu. Es omis mistiba disa Jeremias dentru di fonti pa i muri. Ma ku ajuda di Jeova, i kapli!

Ke ku bu pudi aprindi di isemplu di Jeremias? — Utru ora i ta sintiba medu, ma mesmu asin i ka para papia ku jintis aserka di Jeova. Ora ku bu na papia ku jintis aserka di Jeova, talves e pudi gozau o paña raiba di bo. Talves bu pudi burguñu o te mesmu sinti medu. Ma nunka ka bu para papia ku jintis aserka di Jeova. Suma ki juda Jeremias, i na judau sempri.