Chiʼ kqatzijoj ri utzij ri Jehová, kʼo jujun winaq kpe koyowal o ketzeʼn chqij. Qastzij wi che kʼax kbʼe pa qanimaʼ. Weneʼ kqachomaj waʼ: «Kintzijoj ta chi ri utzij ri Jehová». ¿La kʼo jumul je achomam at?... Ri Utzij ri Dios kchʼaw chrij jun achi che sibʼalaj xuloqʼoqʼej ri Jehová, are kʼu xa jubʼiqʼ chi xraj che man xchʼaw ta chi chrij. Wajun achi riʼ Jeremías ubʼiʼ. Chqiliaʼ ri xkʼulmataj pa ri ukʼaslemal.

Chiʼ Jeremías koʼl na, Jehová xubʼij che, che kuqʼaxej ubʼixik jun jastaq che nim ubʼanik. Rajawaxik kubʼij chke ri winaq che kkiya kan ubʼanik ri itzelal. Rumal che sibʼalaj kʼax ubʼixik chke ri winaq, ri Jeremías sibʼalaj xuxibʼij ribʼ, rumal laʼ, xubʼij wariʼ che ri Jehová: «Sibʼalaj in koʼl na xuqujeʼ man wetaʼm taj jas kinbʼan che ubʼixik». Ri  Jehová xubʼij che: «Maxibʼij awibʼ, in katintoʼo».

Jeremías xuchaplej ubʼixik che ri tinamit: «We man kiya kan ri itzelal, kkʼajasax iwach». ¿La xkiya kan ubʼanik ri itzelal?... Xkiya taj, jujun chke xetzeʼn chrij jujun chik sibʼalaj xpe koyowal. ¡Kʼo jujun xkaj xkikamisaj! ¿Jas kabʼij at che xuchomaj ri Jeremías?... Sibʼalaj xuxibʼij ribʼ xubʼij wariʼ: «Kwaj ta chik kintzijoj ri utzij ri Jehová». ¿La qastzij kraj ta chik? ¿La qastzij che xutzijoj ta chi ri utzij ri Jehová?... Qastzij taj. Rumal che ri Jeremías sibʼalaj kuloqʼoqʼej ri Jehová, xuya ta kan utzijoxik ri utzij. Areʼ xuchʼij ri kʼax, rumal laʼ Jehová xutoʼ chkiwach ri ukʼulel.

Jun kʼutbʼal, jun qʼij jujun achijabʼ che e itzel xkikʼaq ri Jeremías pa jun nimalaj kʼwaʼ. Ri Jeremías tajin ksach bʼi pa ri kʼwaʼ, xaq xiw ta wariʼ, kʼot ujoron xuqujeʼ kʼot uwa. ¡Ri xekʼaqow bʼik kkaj che kkamik! ¿La xkam kʼu ri Jeremías? Xkam taj, rumal che Jehová xubʼano che xesax lo chupam ri kʼwaʼ.

Pa wajun bʼantajik riʼ xqilo che, pa neʼ xuxibʼij ribʼ, Jeremías xuya ta kan utzijoxik ri utzij ri Jehová. ¿Jas kawetaʼmaj chrij ri xubʼano?... Weneʼ kʼo winaq xuqujeʼ ketzeʼn chawij o kpe koyowal chiʼ katzijoj ri utzij ri Dios. Weneʼ katkʼixik o kaxibʼij awibʼ. Are kʼu mayaʼ kan utzijoxik utzij ri Jehová. Masach pa ajolom che areʼ katutoʼ, junam rukʼ ri Jeremías.