Jehova Diosmanta runakunaman willaptinchikmi wakinkuqa asikunku otaq piñakunku. Chayna kasqankuwanmi hukmanyasqa tarikunchik. Yaqapaschá chayrayku nichwan: “Manañam Jehova Diosmantaqa willakusaqchu”, nispa. ¿Haykapipas chayta nirqankichu? . . . Bibliam willawanchik Jehova Diosta kuyaq huk runamanta, ichaqa yaqallam Diosmanta willakuyta saqerurqa. Paypa sutinmi karqa Jeremias. Qawasun ima pasasqanmanta.

Jeremias mozollaraq kachkaptinmi, Jehova Dios kamachirqa willakunanpaq. ¿Imatam willakunan karqa? Mana allin ruwasqankuta runakuna saqenankupaqmi. Chay ruway sasa kaptinmi Jeremiasqa manchakurqa. Chaymi Jehova Diosta nirqa: “Ancha warmallaraqmi kallani, manam yachanichu imayna willakuyta”, nispa.  Ichaqa Jehova Diosmi nirqa: “Ama manchakuychu, ñoqam yanapasqayki”, nispa.

Hinaptinmi Jeremiasqa runakunaman nirqa: “Mana wanakuspaykichikqa wañunkichikmi”, nispa. ¿Runakunaqa kasukurqakuchu chay nisqanta? . . . Manamá. Wakinkuqa asikurqakum, wakinkuñataq piñakurqaku. ¡Wakinkuqa wañurachiytaraqmi munarqakupas! ¿Manchakurqachu Jeremias chay ruwasqankumanta? . . . Arí, anchatam manchakurqa, chaymi nirqa: “Jehova Diosmanta willakuytaqa manañam munanichu”, nispan. Ichaqa, ¿saqerurqachu Diosmanta willakuyta? . . . Manamá. Jeremiasqa Jehova Diosta anchata kuyasqanraykum hinalla willakurqa. Chaymi Jehova Diosqa mana allin runakunamanta waqaycharqa.

Huk kutipim, mana allin runakuna Jeremiasta uku-uku pozoman wischuykurqaku. Chaypim Jeremiasqa yakumanta hinaspa mikuymanta karqa. Chay runakunaqa Jeremias wañunantam munarqaku. Ichaqa Jehova Diosmi yanapaykurqa chay pozomanta lloqsimunanpaq.

Jeremiasqa wakinpi manchakuspanpas Jehova Diosmanta willakuytaqa manam saqerqachu. ¿Imatam paymanta yachawaq? . . . Wakinpiqa Diosmanta willakuptikim runakunaqa asikunmanku otaq piñakunmankupas. Chaymi penqakuwaq otaq manchakuwaqpas. Ichaqa ama haykapipas saqeychu Jehova Diosmanta willakuytaqa. Jeremiasta hinam yanapasunki.