Varesave manuša amendar asan a hine choľamen, sar vakeras čiže das duma pal o Jehovas. Možno pes imar amenge na kamel dureder te vakerel pal o Del. Ačhiľa pes tuke imar ada? — E Biblija phenel pal jekh terno čhavo, so kamelas le Jehovas. Ale na kampelas but a oda terno preačhiľahas te del duma pal o Del. Ov pes vičinelas Jeremijaš. Genaha peske akana buter pal leste.

O Jehovas diňa uloha le terne Jeremijaš, kaj te phenel le manušenge, kaj te preačhen te kerel nalačhipena. Ov daralas, bo ada sas phari uloha prekal leste. Phenďa le Jehovaske: „Me na džanav, so te phenel, se me som mek ternoro.“ O Jehovas leske phenďa: „Ma dara, me tuke pomožinava.“

 Avka o Jeremijaš chudňa te vakerel le manušenge, hoj te pes na zmeňinena, avela pre lende bibacht čiže ňešťesca. So phenes, šunenas o manuša le Jeremijaš? — Na, on lestar kerenas pherasa, kerenas vika pre leste a varesave les kamenas te murdarel. Sar sas le Jeremijašiske? — Ov igen daralas a phenďa: „Imar pal lende na džava, kaj lenca te dav duma pal o Jehovas.“ Preačhiľa te vakerel pal o Del? — Na, ov ada na kerďa. Ov kamelas le Jehovas avka, hoj našťi preačhiľa te del duma pal leste. A vašoda, hoj o Jeremijaš na preačhiľa te vakerel, o Jehovas les ochraňinelas.

Jekhvar varesave nalačhe murša čhide le Jeremijaš andre bari chaňig, kaj na sas paňi ale but čhik. Na sas les ode, so te chal aňi, so te pijel. Ala murša les ode mukhle, kaj ode te merel. Ale o Jehovas leske pomožinďa, kaj pes te zachraňinel!

So tut šaj sikaves le Jeremijašistar? — The te o Jeremijaš varekana daralas, the avka na preačhiľa te del duma pal o Jehovas. Sar vakeres pal o Jehovas le manušenge, on tutar šaj asan abo hine pre tute choľamen. Možno akor tut nane odvaha a daras, ale ňigda ma preačh te del duma pal o Jehovas. O Jehovas tuke furt pomožinela, avka sar le Jeremijašiske.