Ισί φαρ σο πρασάνα-αμέν ο γιαβερά ή χολιάνενα αμένγκε όταν κεράσα λένγκε λάφι ι Ιεχωβάσκε. Οτθάρ μπορεί μα τι μανγκάς τι ξανά κεράς λάφι ι Ντεβλέσκε. Νιωσάλαν ποτές αντικάς;​— Η Αγία Γραφή βακερέλα αμένγκε για τον Ιερεμία, εκχέ τερνέ τσσαβέσκε σο μανγκέλας ι Ιεχωβάς, αλλά νακχλό λέσκε γκοντιάταρ τι σταματίνελ τι κερέλ λάφι ι Ιεχωβάσκε. Για τι σικλιάς λέσκε πιο μπουτ.

Όταν ο Ιερεμίας ισινέ τερνό, ο Ιεχωβά βακερντάας λέσκε ότι έπρεπε τι βακερέλ κο τζενέ τι τσσιναβέν τι κερέν μπέτι πράγματα. Ο Ιερεμίας πακιάλας ότι ανταβά ισινέ μπουτ δύσκολος ντα νταρέλας. Βακερντάς κο Ιεχωβά: “Να τζανάβα σο τι βακεράβ λένγκε. Ισινόμ χουρντό”. Αλλά ο  Ιεχωβά βακερντάς λέσκε: “Μα ντάρα. Με κα βοηθίναβ-τουτ”.

Οτθάρ, ο Ιερεμίας αρχισάλο τι βακερέλ κο τζενέ ότι, άμα να κα αλλάνενας, κα τιμωρίντιβενας. Πακιάσα ότι βον κερντέ οντουβά σο βακερντάς λένγκε;​— Όχι. Πρασάνας-λες ή χολιάνενας λέσκε μπουτ. Ισινέ τζενέ σο μανγκένας τι μουνταρέν-λες! Σαρ πακιάσα ότι αισθάντιλο ο Ιερεμίας;​— Νταρασάλο ντα βακερντάς: “Να κεράβα ατζέ φαρ λάφι ι Ιεχωβάσκε”. Αλλά κερντάς-λες τελικά ανταβά;​— Όχι. Μανγκέλας αζόμ μπουτ ι Ιεχωβάς σο ναστί τσσιναβέλας τι κερέλ λέσκε λάφι. Ντα επειδή συνεχιντάς, ο Ιεχωβά αρακχαντάς-λες.

Για παράδειγμας, κάποια τζενέ σο να ισινέ ιτς λατσσέ φουρτιντέ-λες εκχέ μπαρέ γουρνάτε σο ισινέ πφερντί τσικ. Ο Ιερεμίας να τθερέλας ούτε χαμπέ ούτε πανί. Μανγκένας τι μουκχέν-λες τι μερέλ οτθέ. Όμως, ο Ιεχωβά βοηθιντάς-λες τι σώντιβελ!

Σο σικλιόσα οντουλένταρ σο κερντάς ο Ιερεμίας;​— Ισινέ φαρ σο νταρέλας, αλλά να τσσιναντάς τι κερέλ λάφι ι Ιεχωβάσκε. Όταν τούι κερέσα λάφι ι Ιεχωβάσκε, ο γιαβερά μπορεί τι πρασάν-τουτ ή τι χολιάνεν τούκε. Μπορεί τι λατζάσα ή ατζέ τι νταρέσα-ντα. Αλλά ποτές μα τι τσσιναβές τι κερές λάφι ι Ιεχωβάσκε. Βοβ κα βοηθίνελ-τουτ συνέχεια, σαρ βοηθιντάς ι Ιερεμιάς-ντα.