Kana vorbinas pal o Jehova, le manusha prassan vaj xolyajven pe amende. Anda kadi chi kamas te vorbinas majdur pal o Del. Vi tu hatyardan tu kade? (. . .) Ande Biblia shaj ginaves pal jekh terno shavo, kon zurales kamlas le Jehovas. Voj kodo gindindas, ke chi vorbil majdur pal o Jehova. Voj sas o Jeremiash. Pinzharas les majfeder.

Kana o Jeremiash terno sas, o Jehova butyi das leske. Trubundas te phenel le manushenge, hoj te na keren nasul. Kadi phari butyi sas, thaj o Jeremiash darajlas. Kado phendas le Jehovaske: „Chi zhanav, so te phenav lenge. Inke terno shavo som.” De o Jehova kadi vorba das leske: „Na dara. Me zhutino tuke.”

 O Jeremiash phendas le manushenge, hoj o Del marel len, majdur nasul te kerena. So gindines, shunde po Jeremiash? (. . .) Na. Avri prassajle les, vaj xolyajline po Jeremiash. Unyizhene kamle te mudaren les! So gindines, sar hatyardas pe o Jeremiash? (. . .) Zurales darajlas, thaj kado phendas: „Chi vorbinav majdur pal o Jehova.” De muklas e butyi? (. . .) Na. Majdur vorbilas, ke zurales kamlas le Jehovas. Anda kado o Jehova muntisardas les.

Jekhvar unyi nasul manusha tele shudine ande gropa le Jeremiashes. E gropa pherdo sas chikasa. Nas les kothe xamasko thaj paji. Kothe mukle le Jeremiashes, te merel. De o Jehova zhutindas leske thaj o Jeremiash muntusajlas.

So shaj sityos kathar o Jeremiash? (. . .) Vi atunchi vorbilas pal o Jehova, kana darajlas. Kana vorbis pal o Jehova le manushenge, shaj ke prassan tut vaj xolyajven pe tute. Kathar kado nasules hatyares tu, thaj shaj ke daras. Mindig vorbin pal o Jehova! Voj zhutila tuke, sar vi le Jeremiasheske.