අපි යෙහෝවා දෙවි ගැන කතා කරනකොට සමහර අය අපිට විහිළු කරනවා. තවත් අය අපිට බණිනවා. ඒ නිසා දෙවි ගැන කතා කරන එක නවත්තන්න අපිට හිතෙන්න පුළුවන්. ඔයාටත් එහෙම හිතිලා තියෙනවද?— යෙහෝවා දෙවිට හුඟක් ආදරේ කළත් දෙවි ගැන කතා කරන එක නවත්තන්න හිතුණු කෙනෙක් ගැන බයිබලයේ තියෙනවා. ඒ තමයි යෙරෙමියා.

යෙරෙමියා තරුණ කාලෙදී යෙහෝවා දෙවි එයාට දෙයක් කරන්න කිව්වා. ඒ තමයි නරක දේවල් කරන එක නවත්තන්න කියලා මිනිසුන්ට කියන එක. ඒක ලේසි දෙයක් නෙමෙයි. එයා හුඟක් බය වෙලා දෙවිට කිව්වා ‘මං තාම තරුණයි. අනික මොනවද කතා කරන්න ඕනෙ කියලා මං දන්නෙත් නැහැ’ කියලා. එතකොට දෙවි මෙහෙම කිව්වා ‘බය වෙන්න එපා. මං ඔයාත් එක්ක ඉන්නවා.’

 යෙරෙමියා මිනිස්සු ළඟට ගිහින් දෙවි කියපු දේ කිව්වා. යෙරෙමියා කියපු දේ මිනිස්සු ඇහැව්වා කියලා ඔයා හිතනවද?— නැහැ, මිනිස්සු එයාට විහිළු කළා. එයාට බැන්නා. සමහර අය එයාව මරන්නත් හැදුවා. ඔයා හිතන්නේ ඒ වෙලාවේ එයාට මොනවා හිතෙන්න ඇද්ද?— එයා බය වුණා. යෙරෙමියා කිව්වා ‘මං නං ආයෙත් යෙහෝවා දෙවි ගැන කතා කරන්නේ නැහැ’ කියලා. එයා ඇත්තටම එහෙම කළාද?— නැහැ. එයා යෙහෝවා දෙවිට ගොඩක් ආදරේ කරපු නිසා එයාට දෙවි ගැන කතා කරන්නේ නැතුව ඉන්න බැරි වුණා. ඒ නිසා දෙවි එයාව ආරක්ෂා කළා.

දවසක් නපුරු මිනිස්සු ටිකක් යෙරෙමියාව මඩ තිබුණු ගැඹුරු ළිඳකට දැම්මා. කන්න බොන්න නැතුව යෙරෙමියා මැරෙයි කියලයි ඒ අය හිතුවේ. ඒත් යෙහෝවා දෙවි එයාව බේරගත්තා.

යෙරෙමියාගෙන් ඔයාට ඉගෙනගන්න පුළුවන් මොනවද?— සමහර වෙලාවට බය හිතුණත් යෙහෝවා දෙවි ගැන කතා කරන එක එයා නැවැත්තුවේ නැහැ. ඔයාත් දෙවි ගැන කතා කරද්දී සමහර අය ඔයාට විහිළු කරයි, බණියි. ඒ වෙලාවට ඔයාට ලැජ්ජා හිතෙයි. බය හිතෙයි. ඒත් දෙවි ගැන කතා කරන එක කවදාවත් නවත්තන්න එපා. මොකද යෙරෙමියාට උදව් කළා වගේ යෙහෝවා දෙවි අනිවාර්යයෙන්ම ඔයාටත් උදව් කරනවා.