Mito wote mannu Yihoware kayinse coyiˈneemmo wote haariimara woy hanqara dandaanno. Tini Maganunnire mannaho kula agurate hendeemmo gede assitankera dandiitanno. Ati hatto yite hedde egennootto?— Qullaawu Maxaafi mittu Yihowa baxanno wedellichi xagge kulannonke; isi Yihoware kayise dicoyiˈreemmo yaate geeshsha iillino yanna no. Isi suˈmi Ermiyaasiiti. Hanni isi xagge lende ronso.

Ermiyaasi shiimu noo waro, Yihowa mannu bunshe assa aguranno gede kulara hajajinosi. Tenne kula isira kabbaade ikkitinosi, qoleno isi waajjino. Isi Yihowa togo yiino: ‘Mayyee coyiˈreemmoro diafoommo. Ani qaaqqohowe.’ Yihowa kayinni, ‘Waajjitooti ani kaaˈleemmohena’ yiisi.

 Konni daafira Ermiyaasi mannaho, bunshe assa agura hoogginiro qaxxaˈˈantinanni yee kula jammari. Mannu Ermiyaasi yiinore assinoha lawannohe?— Diassino. Isinni haariiminosi; hattono lowo geeshsha hanqinosi. Mitu manni isinni shaasira nafa kaino! Ermiyaasi hakkawote hiitto ikkinoha lawannohe?— Isi waajje togo yiino: ‘Xaate mannaho Yihoware kayise dicoyiˈreemmo.’ Hatto yoolla ikkinnina coyiˈra agurinoni?— Diagurino. Isi Yihowa lowo geeshsha baxanno daafira isire mannaho kula diagurino. Ermiyaasi Yihoware coyiˈra agurinokki daafira Yihowa gawajjotenni agarinosi.

Lawishshaho, mitte higge bushuullu mannooti sabbu woˈmino balera tuggusi. Hakko sagaleno waano afiˈra didandaanno. Kuri mannooti iso hakko tugginohu reyara yiteeti. Ikkollana Yihowa kaaˈleennasi reyotenni gatino!

Ermiyaasi xaggenni maa rosatto?— Isi mito wote waajjinoha ikkirono, Yihoware coyiˈra diagurino. Yihoware kayisse coyiˈratto wote, mannu haariimara woy hanqahera dandaanno. Tini saalfachishshahera woy waajjishshahera dandiitanno. Ikkirono Yihoware kayisse coyiˈra horo agurtooti. Isi Ermiyaasi kaaˈlinonte gede, ateno kaaˈlannohe.