Son leisi sma e lafu wi noso den e atibron te wi e fruteri den fu Yehovah. Disi kan meki taki wi no wani taki moro fu Gado. Oiti yu kisi a firi dati?​— Bijbel e fruteri wi fu wan yonguman di ben lobi Yehovah. Ma wan pisi ten a no ben wani taki moro fu Yehovah. A yonguman disi ben nen Yeremia. Meki wi luku san ben pasa nanga en.

Di Yeremia ben yongu, Yehovah seni en fu warskow a pipel taki den no musu du ogri moro. A sani disi ben muilek gi Yeremia èn a ben frede. A taigi Yehovah: ’Mi no sabi san mi musu taki. Mi na wan boi ete.’ Ma Yehovah taigi en: ’No frede. Mi o yepi yu.’

 Dati meki Yeremia go warskow a pipel taki Yehovah ben o strafu den efu den no tapu nanga den ogri fu den. Yu denki taki a pipel du san Yeremia taki?​— Nôno. Den ben e lafu en. Son leisi den ben e atibron nanga en. Sonwan fu den ben wani kiri en srefi! Fa yu denki taki Yeremia ben e firi?​— A ben frede èn a ben taki: ’Mi no o fruteri sma noti fu Yehovah moro.’ Ma yu denki taki Yeremia du dati?​— Nôno. Yeremia ben lobi Yehovah so te, taki a tan fruteri sma fu Yehovah. Dati meki Yehovah yepi en.

Wan leisi, wan tu ogriman fringi Yeremia na ini wan dipi olo di ben lai nanga tokotoko. Yeremia no ben abi nyanyan èn a no ben abi watra tu. Den man ben wani libi Yeremia na ini na olo meki a dede. Ma Yehovah yepi en fu komoto na ini na olo!

San yu kan leri fu Yeremia?​— Yeremia ben tan fruteri sma fu Yehovah awinsi a ben frede son leisi. Te yu e fruteri sma fu Yehovah, dan a kan taki den o lafu yu noso den o atibron nanga yu. Kande yu o firi syen èn kande yu o frede srefi. Ma yu musu tan fruteri sma fu Yehovah. A o yepi yu ala ten, neleki fa a ben yepi Yeremia.