Ngaletinye tikhatsi, bantfu bahlekisa ngatsi nobe basitfukutselele nasikhuluma nabo ngaJehova. Loku kungasenta sifune kuyekela kukhuluma ngaNkulunkulu. Wake wativa yini ngaleyo ndlela?— LiBhayibheli lisitjela ngemfana losemusha lobekatsandza Jehova, kodvwa lowacishe wayekela kukhuluma ngaye. Libito lakhe bekunguJeremiya. Ase sifundze kabanti ngaye.

Ngesikhatsi Jeremiya aselijaha, Jehova wamtjela kutsi bekufanele ecwayise bantfu kutsi bayekele kwenta tintfo letimbi. Loku bekumetima kakhulu kuJeremiya futsi bekesaba kukwenta. Watsi kuJehova: ‘Angati kutsi kufanele ngikhulume ngitsini. Ngisengumfana nje.’ Kodvwa Jehova watsi kuye: ‘Ungesabi. Ngitakusita.’

 Ngako Jeremiya wacala kwecwayisa bantfu ngekutsi bebatawukwehlelwa ngulokubi nangabe bangashintji. Ucabanga kutsi labantfu bakwenta yini loko lobekushiwo nguJeremiya?— Cha, abazange. Bahlekisa ngaye futsi bamtfukutselela kakhulu. Labanye bebafuna ngisho nekumbulala. Ucabanga kutsi wativa njani Jeremiya?— Wativa esaba, futsi watsi: ‘Angeke ngisaphindze ngikhulume ngaJehova.’ Kodvwa wayekela mbamba yini?— Cha, akazange. Abemtsandza kakhulu Jehova kangangekutsi akazange akhone kuyekela kukhuluma ngaye. Ngesizatfu sekutsi Jeremiya akayekelanga kukhuluma ngaye, Jehova wamvikela.

Sibonelo saloko ngunasi: Ngalesinye sikhatsi, lamanye emadvodza langakalungi ajika Jeremiya emgodzini loshonako logcwele ludzaka. Jeremiya bekete kudla nobe emanti. Lamadvodza bekafuna kutsi Jeremiya afele lapho. Kodvwa ngenca yekusitwa nguJehova, wasindza.

Yini longayifundza esibonelweni saJeremiya?— Ngisho nobe ngaletinye tikhatsi bekativa esaba, akazange ayekele kukhuluma ngaJehova. Nawukhuluma ngaJehova, bantfu bangase bahlekise ngawe nobe bakutfukutselele. Kungenteka utive unemahloni nobe wesaba. Kodvwa ungacali uyekele kukhuluma ngaJehova. Utawuhlale akusita njengobe nje asita Jeremiya.