Mạeng i kitẹ měhabarẹ̌ parentang Yehuwa, pẹ̌sěnsul᷊ẹ piạ taumata mạdiri dumaringihẹ̌. I sire mẹ̌pědu arau mělangehẹ̌ si kitẹ. Ndaị ene měkoạ si kitẹ matakụ měhabarẹ̌ parentang Yehuwa. Apa i kau lai bọu natakụ?— Su Alkitapẹ̌ piạ běke anạ mangudạ, arenge i Yeremia. I sie masayang si Yehuwa, katewe piạ sěnsul᷊ẹ i sie seng mạdiri měhabarẹ̌ parentang Yehuwa. Mahi i kitẹ mẹ̌basa běkene.

Su tempong i Yeremia bědang mangudạ, Yehuwa něngoro si Yeremia pẹ̌bera su taumata, pěngědo měkoạ barang dal᷊akị. Si Yeremia, ene tawe gampang, i sie lai matakụ. I sie nẹ̌bera: ’Iạ běga harusẹ̌ měhabarẹ̌ apa si sire. Iạ bědang mangudạ.’ Katewe i Yehuwa simimbahẹ̌: ’Abe katakụ. Iạ sarung mẹ̌tul᷊ung si kau.’

 Hakị u ene, i Yeremia něhabarẹ̌ parentang Yehuwa su taumata, mạeng i sire tawe dumaringihẹ̌, i sire sarung ihukung karạ i Yehuwa. Mạeng si kau kerea, apa i sire někoạ apa niwerang i Yeremia?— Tala. I sire nẹ̌taradạ, kụ piạ lai nělangehẹ̌ si sie. Piạ lai taumata mapulu měmate si sie! Mạeng si kau kerea, apa i Yeremia natakụ?— Iya, i sie natakụ-takụ, kụ nẹ̌bera: ’Iạ seng mạdiri měhabarẹ̌ parentang Yehuwa.’ Katewe apa i sie kahěngang-hěngang seng mạdiri?— Tala. I sie masayang si Yehuwa, hakị u ene, i sie tawe něngědo něhabarẹ̌ parentang Yehuwa. Ual᷊ingu i Yeremia turusẹ̌ měhabarẹ̌, i Yehuwa něndiagạ si sie.

Contone, piạ pirang katau taumata dal᷊akị nẹ̌taho si Yeremia su lohang gěguwạ, maral᷊ung, kụ piạ lěbone. I sie tawe nighělịkang kaěng arau inumang. I Yeremia nitěntang sene, tadeạu i sie mate su lohang ene. Katewe, i Yehuwa nẹ̌tul᷊ung si Yeremia, kụ i sie nasal᷊amatẹ̌!

Kerea i kau botonge mẹ̌těno si Yeremia?— Maning pẹ̌sěnsul᷊ẹ i sie matakụ, i sie turusẹ̌ měhabarẹ̌ parentang Yehuwa. Su tempong i kau lai mapulu měhabarẹ̌ parentang Yehuwa, tantu piạ taumata mẹ̌taradạ arau piạ mělangehẹ̌ si kau. I kau lai tantu matakụ arau mamea. Katewe, abe pěngědo, turusẹ̌ pěhabarẹ̌ parentang Yehuwa. I Yehuwa sarung mẹ̌tul᷊ung si kau, mẹ̌sul᷊ung i sie nẹ̌tul᷊ung si Yeremia.