Misy andro o ndatio mikizake ndra boseke amantikagne naho fa mirehake ty miomba i Jehovah tikagne. Hafara’e tikagne tsy te hirehake ty miomba i Jehovah sasa. Fa nahazo azo ka vao zay?... Mirehake ty Baiboly fa nisy ajalahy tea i Jehovah faie tsy te ho nirehake ty miomba aze sasa. I Jeremia ty agnara’e. Andao tikagne handineke ty miomba aze.

Nirahe i Jehovah ty Jeremia tamy tie mbe niajalahy hampitao o ndatio tsy hanao raty sasa. Natahotse ty Jeremia fa sarotse ama’e ty nanao izay. Nirehake tamy i Jehovah reke tie: ‘Izaho anio tsy mahay mirehake fa mbe ajaja!’ Nisaontsy ka ty Jehovah tie: ‘Ko matahotse rehe fa hagnampe azo raho.’

Nampitao o ndatio ty Jeremia fa ho sazean’Andrianagnahare iareo naho tsy miova. Nagnorike ze raha nirehafe i Jeremia vao o ndatio?... Aha’a! Nikizake naho nalaigne aze i ndaty rey. Ty ndaty ila’e te hamono aze. Inogne ty voka izay tamy i Jeremia?... Natahotse reke sady nirehake tihoeke tie: ‘Tsy hirehake ty miomba i Jehovah sasa raho.’ Le tsy nirehake vata’ e vao reke?... Tsy nanao izay reke. Ty hatea i Jeremia i Jehovah ty nahavy aze tsy nijanogne fa nanohy nirehake ty miomba aze. Le niaro aze ty Jehovah.

Tamy ty andro raike, le natora ty ndaty raty fagnahy tagnate lavake feno fotake ty Jeremia. Tsy nisy hanegne ho nihanegne naho rano hinomegne ty tao. Niteà i ndaty rey ho vinono agnate lavake ao reke. Faie nagnampe aze ty Jehovah, le tsy nimate reke.

Inogne ty raha soa nanoe i Jeremia toko’ e hianarantikagne?... Ndra tie natahotse reke, le tsy nijanogne fa nirehake ty miomba i Jehovah. Va’e hikizake naho halaigne azo ka o ndatio naho mirehake ty miomba i Jehovah rehe. Va’e ho megnatse naho hatahotse rehe naho trà izay. Ndra tie eo zay, le mirehafa ty miomba i Jehovah avao rehe. Hagnampe azo manahake ty nagnampea’e i Jeremia ty Jehovah.