Ace apakio ekwenatar itunga karai bonat anyunyurikin oni nainerar oni ka kesi nuikamunitos Yawe. Epedorete nu ainakin oni ikoto ajalakin einer nuikamunitos Edeke. Ijo kipupunitor koipone kangol?— Elimokinit oni Ebaibuli nuikamunitos etunganan lo aroko adit lo amina Yawe konye abeit apalar einer nuikamunitos nges. Arai ekekiror Yeremia. Aso esisiautu nuipu nuikamunitos nges.

Ne araar Yeremia esapat, Abu Yawe kolimok nges ebe ebusakinit nges aikwenyar itunga ajalakin aswam iboro lukarokok. Karaas nu nuatioko noi kanejai Yeremia, ido akuriana. Abu kolimok Yawe: ‘Mam eong ajeni nualimuni. Arai eong isapat.’ Konye kotema nges Yawe ebe: ‘Mam ikuriana. Abuni eong aingarakin ijo.’

 Aso abu Yeremia kogeu aikwenyanar itunga ebe eponio alecor kes karai mam kesi kijulakinete aswamisio kec. Kiwomit ijo ebe apotu itunga kiswamata nuabu Yeremia kolimok kesi?— Mam. Apotu itunga kokwenatar ka anyunyurikin keda nges. Ice da akotosi aiyar nges! Eipone bo ani iwomitor ijo abu Yeremia kopupunia?— Arai lo akuriana ido abu kotema ebe: ‘Mam eong bobo cut alosi einer nuikamunitos Yawe.’ Konye abu nges cut kopala?— Mam, mam nges abu kopala. Amina nges Yawe noi ido mam apedori apalar einer nuikamunitos nges. Kanu naarai mam Yeremia abu kopala, abu Yawe kidar nges.

Kwape aanyunet, apotu itunga lukarokok kocakakisi Yeremia toma aipany naidul napol erit. Amameotor nges keda inyamat karai da akipi. Akotosi itunga ngul ajalakin Yeremia ngina atwanere. Konye kanu aingarakinio ka Yawe, abu nges oku.

Anyoika bo nuipedori ijo aisisiaun kanejai aanyunet ke Yeremia?— Karaida ekuriana nges ice sawan, mam nges abu kopala einer nuikamunitos Yawe. Ne inerar ijo nuikamunitos Yawe, eminasi itunga kokwenatar araibo anyunyurikin ijo. Katicepak irumete ijo ileic arai bo akurianar. Konye mam kipalari einer nuikamunitos Yawe. Ebuni nges aingaranakin ijo, kwape engarakina Yeremia.