Iētahi taimi e taufakalili pe feita mai nā tino ki a te ki tatou kāfai e tautala ki tatou e uiga ki a Ieova. E mafai ke taofi ki tatou mai te fia tautala e uiga ki a Ieova. Pe i ei ni ō fakalagona vēia?​— E lea mai te Tuhi Paia nae i ei he tamāloa talavou na alofa ki a Ieova kae na toeitiiti taofi tana tautala e uiga ki a te ia. Ko Ielemia tona igoa. Ke akoako ki tatou e uiga ki a te ia.

I te taimi nae talavou ai ia Ielemia, na talanoa ia Ieova ki ei ke lapataki nā tino ke taofi te fai o nā mea kino. Na faigatā lele mo Ielemia ke fai, ma mataku ai ia. Na lea vēia ki a Ieova: ‘E hē ko iloa haku tala ke fai, ko au ko he tamaiti.’ Kae na talanoa atu ia Ieova: ‘Nahe mataku. E fehoahoani atu au.’

 Tēia na kamata oi lapataki e Ielemia nā tino ka fakahala ki latou kāfai e hē faia ni huiga. He ā tō manatu, na fai e nā tino te mea na taku atu e Ielemia?⁠— Heai. Na taufakalili pe feita atu ki a te ia. Ko iētahi na fia finau ia! He ā tō manatu, he tē na mafaufau ki ei ia Ielemia?⁠— Na mataku ia ma lea vēia: ‘Ko au ka hē toe tautala e uiga ki a Ieova.’ Kae na fiu moni ia?​— Heai. Na hē mafai oi taofi tana tautala e uiga ki a Ieova ona ko tona alofa ki ei. Na puipui e Ieova Ielemia auā na heki vave fiu ia Ielemia.

Mo he fakatakitakiga na togi ia Ielemia ki he pu e tumu i te palapala e ni tamāloa kino. Nae hēai ni ana meakai ma ni vai. Ko nā tamāloa na fia tiaki ia Ielemia ke oti. Kae na fehoahoani atu Ieova, ma hola kehe ai ia!

He ā he akoakoga e maua e koe mai te fakatakitakiga a Ielemia?​— E tuha nae i ei nā taimi na mataku ai ia, na tautala pea ia e uiga ki a Ieova. I na taimi e talanoa ai koe e uiga ki a Ieova, hōvē e taufakalili pe feita atu nā tino ki a te koe. Hōvē e mā koe pe mataku foki. Nahe taofia tō tautala e uiga ki a Ieova. E fehoahoani atu pea ki a te koe, e vē ko tana fehoahoani ki a Ielemia.