Mbala efula, anto tɔsɔkaka ndo tookaka nkɛlɛ etena katɛkɛtaso akambo wendana la Jehowa. Dui sɔ koka ndjotokonya diaha sho ntetemala ntɛkɛta akambo wendana la Nzambi. Onde wɛ atayaokaka ngasɔ ndooko lushi?— Bible totɛka dikambo di’ɔlɔngɔlɔngɔ ɔmɔtshi wakokaka Jehowa ngandji, koko waki suke la ntshika ntɛkɛta akambo wendana la nde. Lokombo lande ko Jɛrɛmiya. Ɛsɔ tɔsɛdingole akambo amɔtshi wendana la nde.

Etena kaki Jɛrɛmiya eke dikɛnda, Jehowa akawotɛ dia nde mbewola anto dia vɔ ntshika nsala kɛnɛ kele kɔlɔ. Dui sɔ diaki wolo efula le Jɛrɛmiya ndo nde akoke wɔma. Nde akatɛ Jehowa ate: ‘Haleye ɔtɛkɛta ndo leke dikɛnda.’ Diakɔ diakawotɛ Jehowa ate: ‘Tookake wɔma, dimi layokokimanyiya.’

Ɔnkɔnɛ, Jɛrɛmiya akatatɛ mbewola anto dia vɔ wayolongola dilanya naka hawotshikitanyisha  etsha awɔ. Onde wɛ fɔnyaka di’anto wakakitanyiya kɛnɛ kakawatɛ Jɛrɛmiya kɛsɔ?— Ndooko. Vɔ wakɔsɔkɛ ndo wakawoke nkɛlɛ. Amɔtshi l’atei awɔ wakalange ndo mbodiaka. Ngande wafɔnyayɛ wakayaoke Jɛrɛmiya?— Nde akoke wɔma ndo akate ate: ‘Dimi hatɔtɛkɛta nto di’akambo wendana la Jehowa.’ Ko onde mɛtɛ nde akatshike?— Ndooko, nde kootshika. Nde akalangaka Jehowa efula ndo nde kookoka ntshika ntɛkɛta akambo wendana la nde. Ndo lam’ele Jɛrɛmiya koopekɔ, Jehowa akooshimbɛ.

Ɛnyɛlɔ mbala kɛmɔtshi, dengalenga dimɔtshi diakadje Jɛrɛmiya lo difuku dia lɔtɛkɛ. Lɔkɔ, nde komonga l’akoka wa nkondja mbo ya ndɛ kana ashi wa nnɔ. Anto asɔ wakalange dia Jɛrɛmiya mvɔ lo difuku sɔ. Koko l’ekimanyielo ka Jehowa, Jɛrɛmiya akahandɔ.

Wetshelo akɔna wakokayɛ nkondja oma l’ɛnyɛlɔ ka Jɛrɛmiya?— Kaanga mbakinde la wɔma lo tena dimɔtshi, nde kootshika ntɛkɛta akambo wendana la Jehowa. Ɔnkɔnɛ, etena katɛkɛtayɛ akambo wendana la Jehowa, anto mbeyaka kɔɔnyɔla ndo kooka nkɛlɛ. Wɛ mbeyaka ndjaoka oko onto l’anyanya kana mboka wɔma. Koko, totshikake pondjo ntɛkɛta akambo wendana la Jehowa. Nde ayokokimanyiya oko wakandakimanyiya Jɛrɛmiya.