‘I he taimi ‘e ni‘ihi ‘oku fakakata‘aki kitautolu ‘e he kakaí pe ‘ita mai kia kitautolu ‘i he taimi ‘oku tau talanoa ai kia kinautolu ‘o fekau‘aki mo Sihová. ‘Oku ‘ai ‘e he me‘á ni ke tau loto ke tuku ‘etau talanoa fekau‘aki mo e ‘Otuá. Kuó ke fa‘a ongo‘i pehē?— ‘Oku tala mai ‘e he Tohi Tapú kiate kitautolu fekau‘aki mo ha ki‘i talavou na‘e ‘ofa kia Sihova ka na‘á ne meimei tuku ‘ene lea fekau‘aki mo iá. Ko hono hingoá ko Selemaia. Tau ako lahi angé fekau‘aki mo ia.

‘I he taimi na‘e kei si‘i ai ‘a Selemaiá, na‘e tala ‘e Sihova ki ai ke ne fakatokanga ki he kakaí ke tuku ‘enau fai koví. Na‘e faingata‘a ‘aupito eni kia Selemaia pea na‘á ne ilifia. Na‘á ne tala ange kia Sihova: ‘‘Oku ‘ikai ke u ‘ilo‘i ‘a e me‘a ke lea‘akí.  Ko ha tamasi‘i pē au.’ Ka na‘e tala ange ‘e Sihova: ‘‘Oua ‘e ilifia. Te u tokoni‘i koe.’

Ko ia na‘e kamata ke fakatokanga ‘a Selemaia ki he kakaí ‘e tautea‘i kinautolu kapau he‘ikai ke nau liliu. ‘Okú ke fakakaukau na‘e fai ‘e he kakaí ‘a e me‘a na‘e tala ange ‘e Selemaiá?— ‘Ikai. Na‘a nau fakakata‘aki ia na‘a mo ‘enau ‘ita ‘aupito ai. Na‘e a‘u ‘o loto ‘a e ni‘ihi ke tāmate‘i ia! ‘Okú ke pehē na‘e ongo‘i fēfē ‘a Selemaia?— Na‘e ilifia peá ne pehē: ‘He‘ikai te u toe lea fekau‘aki pea mo Sihova.’ Ka na‘á ne fo‘i mo‘oni?— ‘Ikai, na‘e ‘ikai ke pehē ia. Na‘á ne ‘ofa lahi ‘aupito kia Sihova na‘e ‘ikai lava ai ke tuku ‘ene lea fekau‘aki mo iá. Pea koe‘uhí ko e ‘ikai ke fo‘i ‘a Selemaiá, na‘e fakahaofi ia ‘e Sihova.

Ko e fakatātaá, ‘i he taimi ‘e taha na‘e lī ‘e ha kau tangata kovi ‘a Selemaia ki ha fu‘u luo na‘e fonu pelepela. Na‘e ‘ikai ke ‘i ai ha‘ane me‘akai pe vai. Na‘e loto ‘a e kau tangatá ke tuku pē ai ‘a Selemaia ke mate. Ka ‘i he tokoni ‘a Sihová na‘á ne hao!

Ko e hā ‘e lava ke ke ako meia Selemaiá?— Neongo na‘e ilifia ‘a Selemaia ‘i he taimi ‘e ni‘ihi, na‘e ‘ikai ke tuku ‘ene lea fekau‘aki mo Sihová. ‘I ho‘o talanoa fekau‘aki mo Sihová, ‘e fakakata‘aki nai koe ‘e he kakaí pe ‘ita atu kia koe. Te ke ongo‘i mā nai pe a‘u ‘o ilifia. Kae ‘oua ‘aupito ‘e tuku ‘a e lea fekau‘aki mo Sihová. Te ne tokoni‘i ma‘u pē koe, ‘o hangē ko ‘ene tokoni‘i ‘a Selemaiá.