Cimwi ciindi bantu balakonzya kutusampula naa kutunyemena ciindi notwambuula ambabo atalaa Jehova. Eezyo zilakonzya kutupa kuyanda kuleka kwaambuula atalaa Jehova. Kuli mpuwakali walimvwa mbuboobo na?— IBbaibbele litwaambila atalaa mwaalumi wakali kuyanda Jehova pesi wakali wayanda kuleka kwaambula atalaa nguwe. Izina lyakwe wakali Jeremiya. Atwiiye zyiingi atalaa nguwe.

Ciindi Jeremiya naakali mulombe, Jehova wakamwaambila kuti acenjezye bantu kuti baleke kucita zintu zibi. Eeci cakali ciyumu kuli Jeremiya alimwi wakali kuyoowa. Wakaambila Jehova kuti: ‘Nsizi pe kuti ndiyootyeni kulimbabo. Ndicili mwanikenike.’ Pesi Jehova wakamusandula kati: ‘Utayoowi pe. Ndiyookugwasya.’

 Nkinkaako Jeremiya wakatalika kucenjezya bantu kuti bakali kuyoosubulwa ikuti baleka kucinca nzila zyabo zibi. Ubonaanga bantu bakacita mbuli mbwaakabaambila na Jeremiya?— Teenzibakacita pe. Bakamusampula naa kumunyemena, alimwi bamwi bakali kuyanda kumujaya! Ubonaanga Jeremiya wakamvwa biyeni?— Wakayoowa alimwi wakati: ‘Nsicikoyoowambuula lubo atalaa Jehova.’ Pesi wakaleka na?— Taakaleka pe. Wakali kuyandisya Jehova zyakuti taakaleka pe kwaambuula atalaa nguwe. Jehova wakakwabilila Jeremiya akaambo kakuti taakaleka kwaambula atalaa nguwe.

Mucikozyanyo, muli cimwi ciindi, bamwi baalumi babi bakawaalila Jeremiya mudindi lyakalaa matope. Taakalikwe cakulya naa maanzi aakunywa. Baalumi aabo bakali kuyanda kuti Jeremiya afwide mumo. Nikuba boobo, kwiinda mulugwasyo lwaJehova, Jeremiya wakafutuka!

Wiiyaanzi kuzwa kucikozyanyo caJeremiya?— Nikuba kuti cimwi ciindi wakali kuyoowa, taakaleka pe kwaambuula atalaa Jehova. Cimwi ciindi nowambuula atalaa Jehova, bamwi bantu balakonzya kukusampula naa kukunyemena. Ulakonzya kubaa nsoni naa kuyoowa. Pesi utaleki kwaambuula atalaa Jehova. Unookugwasya mbuli mbwaakagwasya Jeremiya.