Sampela taim ol man i save lap long yumi o belhat long yumi taim yumi stori long ol long Jehova. Dispela inap mekim na yumi no amamas moa long autim tok bilong God. Yu save pilim olsem?— Baibel i stori long wanpela yangpela man husat i laikim tru Jehova, tasol ol man i birua long em na klostu em i lusim pasin bilong autim tok. Nem bilong dispela man em Jeremaia. Yumi ken kisim sampela save moa long em.

Taim Jeremaia i yangpela man, Jehova i tokim em long givim tok lukaut long ol manmeri long ol i mas lusim ol pasin nogut ol i save bihainim. Jeremaia i pilim hatwok tru long mekim dispela samting na em i pret. Em i tokim Jehova: ‘Mi no save long wanem tok mi bai mekim. Mi yangpela  tumas.’ Tasol Jehova i tok: ‘No ken pret. Bai mi helpim yu.’

Olsem na Jeremaia i givim tok lukaut long ol manmeri olsem Jehova bai panisim ol sapos ol i no senisim pasin bilong ol. Yu ting ol manmeri i bihainim tok bilong Jeremaia?— Nogat. Ol i lap long em na ol i belhat nogut tru long em. Sampela i tingting long kilim em i dai! Yu ting Jeremaia i pilim olsem wanem?— Em i pret, olsem na em i tok: ‘Mi no inap moa autim tok bilong Jehova.’ Tasol yu ting tru tru em i givap?— Nogat, em i no givap. Em i laikim tru Jehova, olsem na em i autim yet tok bilong Em. Na bikos Jeremaia i no givap, Jehova i lukautim em na em i stap gut.

Wanpela taim sampela man nogut i tromoi Jeremaia i go daun long hul i pulap long graun malumalum. Em i no gat kaikai na wara. Ol dispela man i laik bai Jeremaia i dai insait long dispela hul. Tasol Jehova i helpim em na em i no dai!

Yu kisim wanem skul long stori bilong Jeremaia?— Maski sampela taim em i pret, em i autim yet tok bilong Jehova. Taim yu stori long ol man long Jehova, ating ol bai lap long yu o belhat long yu. Dispela bai mekim na ating bai yu sem o pret. Tasol no ken larim dispela i pasim yu long autim tok bilong Jehova. Oltaim em bai helpim yu olsem em i bin helpim Jeremaia.