Minkarhi yin’wana vanhu va hi hleka kumbe va nga swi lavi loko hi va chumayela hi Yehovha. Leswi swi nga hi endla hi lava ku tshika ku chumayela hi Xikwembu. Xana u tshame u titwa hi ndlela yoleyo?— Bibele yi hi byela hi mufana un’wana loyi a a rhandza Yehovha kambe a laveke ku tshika ku chumayela. Vito ra yena a ku ri Yeremiya. A hi dyondzi swo tala hi mufana loyi.

Loko Yeremiya a ha ri mufana, Yehovha u n’wi byele leswaku a a fanele a chumayela vanhu leswaku va tshika ku endla swilo swo biha. Sweswo a swi n’wi tikela Yeremiya naswona a a chava. U byele Yehovha a ku: ‘A ndzi swi tivi leswi ndzi faneleke ndzi swi vula. Ndza ha ri mufana.’ Kambe Yehovha u te: ‘U nga chavi. Ndzi ta ku pfuna.’

 Kutani Yeremiya u sungule ku chumayela vanhu leswaku a va ta xupuriwa loko va nga cinci. Xana u ehleketa leswaku vanhu va endle leswi Yeremiya a swi vuleke?— Doo! Va n’wi hlekile ni ku ka va nga ha n’wi tsakeli. Van’wana a va lava hambi ku ri ku n’wi dlaya! Xana u ehleketa leswaku Yeremiya u titwe njhani?— A a chava kutani u te: ‘A ndzi nge he tlheli ndzi chumayela hi Yehovha.’ Kambe xana hakunene u tshikile?— Doo! A a n’wi rhandza swinene Yehovha lerova a nga ta tshika ku chumayela. Kutani leswi Yeremiya a nga tshikangiki, Yehovha u n’wi sirhelerile.

Hi xikombiso, siku rin’wana vavanuna van’wana vo biha va hoxe Yeremiya egojini ro enta swinene leri taleke hi ndzhope. A a nga ri ni swakudya kumbe mati. Vavanuna volavo a va lava ku n’wi siya kwalaho leswaku a fa. Kambe Yehovha u n’wi pfunile leswaku a baleka!

Xana u nga dyondza yini eka xikombiso xa Yeremiya?— Hambileswi minkarhi yin’wana a a chava, a nga tshikanga ku chumayela hi Yehovha. Loko u chumayela hi Yehovha, vanhu va nga ha ku hleka kumbe va nga ha ku tsakeli. U nga ha nyuma kumbe u chava. Kambe u nga tshiki ku chumayela hi Yehovha. Minkarhi hinkwayo u ta ku pfuna, ku fana na Yeremiya.