Abantu batusekereza kandi obundi kibabiihiza kuturora nitubaza hali Yahwe. Kinu kisobora kutuletera kugonza kulekeraho kubaza hali Ruhanga. Kinu kyaali kikuhikireho?— Baibuli etugambira hali omusaija omu ayagonzaga Yahwe baitu akaba ali haihi kuleka kumubazaho. Bamwetaga Yeremiya. Katweyongere kumanya ebirukumukwataho.

Yahwe akagambira Yeremiya agambire abantu balekeraho kukora ebintu ebibi, baitu Yeremiya akaba ali mwojo bwojo. Akatiina, yagambira Yahwe: ‘Timanyire eky’okubaza. Ndi mwojo bwojo.’ Baitu Yahwe akamugarukamu: ‘Otatiina, ninyija kukukonyera.’

Yeremiya akatandika kugambira abantu ngu baali nibagenda kutunga ebizibu  kakuba batahindura omu ngeso zaabu. Noteekereza abantu bakahinduraho?— Nangwa, batahinduleho. Bakagenda omu maiso n’okumusekereza. Abamu bakagonza n’okumwita. Noteekereza Yeremiya akehu’ra ata?— Akatiina yagamba: ‘Tindukugenda kweyongera kubaza hali Yahwe.’ Baitu noteekereza akaleka kubaza hali Yahwe?— Nangwa, atalekeraho. Yagonzaga muno Yahwe, nahabwekyo kitamwanguhire kuculera. Habwokuba akeyongera kubaza hali Yahwe, Yahwe akamulinda n’obubagondeze kumwita.

Nk’ekyokuroraho, kiro kimu abasaija ababi bakakwata Yeremiya bamunaga omu kiina ekiijwire ebisaabu. Omu kiina hakaba hatarumu byokulya rundi amaizi g’okunywa. Abasaija abo bakaba nibagonza Yeremiya afeere omu kiina. Baitu Yahwe akamukonyera tiyafa.

Ekyokuroraho kya Yeremiya kitwegesa ki?— Kitwegesa ngu nobwaraaba obundi n’obundi yatiinaga, atalekeraho kubaza hali Yahwe. Obw’obaza hali Yahwe, abantu basobora kukusekereza rundi kukujuma. Osobora kuswara rundi kutiina. Kyonka otalireka kubaza hali Yahwe. Asobora kukukonyera nkoku yakonyire Yeremiya.