Кажан бис кижилерге Иегованың дугайында чугаалаарывыска, олар бисти кыжырып, безин бисче хорадап болур. Оон корткаш, Бурганның дугайында чугаалаарын соксадып болур бис. А сээң-биле ындыг чүве кажан-бир болган бе?~ Библияда Иеговага ынак чораан, аныяк оолдуң дугайында бижээн. Бир катап ол Иегованың дугайында чугаалаарын соксадыптар часкан. Ол оолду Иереми́я дээр турган. Ооң дугайында эки билип аалам.

Иегова аныяк Иеремияга кижилерни багай херектерни кылбас кылдыр чугаалаарын дагзып каан. Иеремияга ол даалга дыка берге ышкаш болган, ынчангаш ол корга берген. Иеремия Иеговага: «Мен дыка аныяк мен, ынчангаш чүве чугаалап билбес мен» — дээн. Ынчалза-даа Иегова аңаа: «Кортпа. Мен сеңээ дузалаар мен» — деп харыылаан.

 Ынчан Иеремия улусту бир эвес олар эттинип албас болза, оларны кеземче манап турар деп сагындырып эгелээн. Кижилер Иеремияның сөстерин тооп дыңнаан бе, чүү деп бодаар сен?~ Чок. Олар ону кочулап, олче аажок хорадай бергеннер. Чамдыктары ону безин өлүрер деп барган! Иеремия чүнү миннип турганыл, билир сен бе?~ Ол корткаш: «Мен моон соңгаар Иегованың дугайында чүве чугаалавас мен» — дээн. Таанда Иеремия, шынап-ла, дүжүп берипкеш, ыттавайн барган бе?~ Чок, болбайн канчаар. Ол Иеговага дыка ынак чораан, ынчангаш ол ооң дугайында чугаалааксап турган. Иеремия чер-ле дүжүп бербес боорга, Иегова ону камгалап чораан.

Бир катап багай кижилер Иеремияны өл малгаштыг, ханы оңгарже киир октапканнар. Олар аңаа аъш-чем-даа, суг-даа бербээн. Олар Иеремияны ол оңгарга өлүп калзын деп күзеп турган. Ынчалза-даа Иегова Иеремияны камгалап алган.

Иеремияның үлегеринден чүнү өөренип ап болур бис?~ Иеремия чамдыкта Иегованың дугайында чугаалаарындан коргуп-даа турган болза, ол ону кылырын кажан-даа соксатпайн турган. Кажан сен Иегованың дугайында чамдык улуска чугаалаарыңга, олар анчыгзынып болур. Улус сени безин кыжырып болур. Ындыг таварылгада сен ыядып азы коргуп болур сен. Ынчалза-даа Иегованың дугайында чугаалаарын кажан-даа соксатпа! Бурган Иеремияга дузалап турганы ышкаш, сеңээ база ынчаар үргүлчү дузалаар.