Olonjanja vimue omanu va tu pembula, ale va tu kuatela onyeño eci tu vangula lavo catiamẽla ku Yehova. Ovina viaco vi pondola oku tu vetiya oku liwekapo oku vangula catiamẽla ku Yehova Suku. Anga hẽ, wa kuatelevo ovisimĩlo viaco?— Embimbiliya li tu sapuilavo eci catiamẽla kumalẽhe umue wa solele Yehova. Pole, wa yonguile oku liwekapo oku vangula catiamẽla kokuaye. Onduko yaye Yeremiya. Tu konomuisi ulandu waye.

Eci Yeremiya a kala umalẽhe, Yehova wo tumile oku lungula omanu oco va liwekepo oku linga ovina ka via sungulukile. Ocikele caco ka ca lelukile ku Yeremiya, kuenda wa kuata usumba. Eye wa sapuila Yehova hati: ‘Sia kũlĩhĩle eci ndi ka popia. Ame ndi mõla.’ Pole, Yehova wo sapuila hati: ‘Ku ka kuate usumba. Ndi ka ku kuatisa.’

 Omo liaco, Yeremiya wa fetika oku lungula omanu loku va sapuila hati, nda ka va lingile apongoloko, va ka kangisiwa. Ove hẽ, o sima okuti omanu va pokola kovina Yeremiya a va sapuila?— Sio, ka va pokuile. Pole, vo pembula, kuenda vo kuatela onyeño. Vamue pokati kavo, va yonguile oku u ponda! Ove hẽ, wa kũlĩha ndomo Yeremiya a kala?— Eye wa kuata usumba, kuenje, wa popia hati: ‘Lalimue eteke ndi vangula vali catiamẽla ku Yehova.’ Anga hẽ, eye wa liwekapo?— Sio, ka liwekelepo. Omo okuti Yeremiya wa solele calua Yehova, ka liwekelepo oku vangula catiamẽla kokuaye. Omo lioku amamako lupange waye, Yehova wo popela.

Eteke limue, alume vamue vavĩ va imbile Yeremiya vocisimo mua kala olonata. Eye ka kuatele okulia, ndaño ovava. Omanu vaco va yonguile okuti Yeremiya o fila vocisimo caco. Pole, Yehova wo kuatisa, kuenje wa puluka!

Nye o pondola oku lilongisa kulandu wa Yeremiya?— Ndaño olonjanja vimue wa kuatele usumba, pole, ka liwekelepo oku vangula catiamẽla ku Yehova. Eci o vangula catiamẽla ku Yehova, citava okuti, omanu va ku pembula, ale va ku kuatela onyeño. Citava okuti o kuata osõi, ale usumba. Pole, ku ka liwekepo oku vangula catiamẽla ku Yehova. Momo, o pondola oku ku kuatisa ndeci a kuatisa Yeremiya.