Zwiṅwe zwifhinga vhathu vha a ri sea kana vha ri kwatela musi ri tshi amba navho nga ha Yehova. Zwenezwi zwi nga ri ita uri ri litshe u amba nga ha Mudzimu. Naa no no vhuya na ḓipfa nga yeneyo nḓila?— Bivhili i ri vhudza nga ha muṱhannga we a vha a tshi funa Yehova, fhedzi a ṱoḓa u litsha u amba nga hae. Dzina ḽawe ḽo vha ḽi Yeremia. Kha ri gude zwo engedzeaho nga hae.

Musi Yeremia a tshee muṱhannga, Yehova o mu vhudza uri o vha a tshi fanela u kaidza vhathu uri vha litshe u ita zwithu zwivhi. Zwenezwi zwo vha zwi tshi konḓela vhukuma Yeremia nahone o vha a tshi khou ofha. O vhudza Yehova uri: “A thi athu u ḓivha u amba; ngauri ndi tshee mutukana.” Fhedzi Yehova a ri: ‘U songo ofha. Ndi ḓo u thusa.’

 Ngauralo Yeremia a thoma u kaidza vhathu uri vha ḓo ṱarafiwa arali vha sa shanduka. Naa ni humbula u nga vhathu vho ita zwe Yeremia a amba?— Hai. Vha nga vha vho mu sea kana vho mu kwatela vhukuma. Vhaṅwe vho vha vha tshi ṱoḓa na u mu vhulaha! Ni vhona u nga Yeremia a nga vha o ḓipfa hani?— O vha a tshi khou ofha nahone a ri: ‘A thi tsha ḓo amba nga ha Yehova na luthihi.’ Fhedzi naa o litsha?— Hai, ho ngo litsha. O vha a tshi funa Yehova vhukuma zwe zwa ita uri a si litshe u amba nga hae. Ngauri Yeremia ho ngo litsha, Yehova o bvela phanḓa a tshi mu tsireledza.

Sa tsumbo, nga tshiṅwe tshifhinga vhanna vhavhi vho posa Yeremia dindini ḽihulu ḽo ḓalaho nga matope. O vha a si na zwiḽiwa kana maḓi. Vhenevho vhanna vho vha vha tshi ṱoḓa u sia Yeremia henefho uri a fe. Fhedzi nga thuso ya Yehova, o ponyoka!

Ndi mini zwine na nga zwi guda kha tsumbo ya Yeremia?— Naho o vha tshi ofha nga zwiṅwe zwifhinga ho ngo litsha u amba nga ha Yehova. Musi ni tshi amba nga ha Yehova, vhathu vha nga ni sea kana vha ni kwatela. Ni nga pfa ni tshi shona kana ni tshi ofha. Fhedzi ni songo litsha u amba nga ha Yehova. U ḓo dzula a tshi ni thusa, samusi o thusa Yeremia.