Danay gintitinawaan kita han mga tawo o nasisina hira ha aton kon nag-iistorya kita mahitungod kan Jehova. Salit bangin diri na kita maruyag pag-istorya mahitungod ha Dios. Inabat mo na ba ito?— An Biblia nagsusumat ha aton mahitungod ha batan-on nga lalaki nga nahigugma kan Jehova pero haros umundang na ha pag-istorya mahitungod ha iya. Hiya hi Jeremias. Kilalahon naton hiya.

Han batan-on pa hi Jeremias, ginsugo hiya ni Jehova nga sidngon an mga tawo nga diri na magbuhat hin maraot. Makuri gud ito para kan Jeremias, ngan nahahadlok hiya. Nagsiring hiya kan Jehova: ‘Diri ako maaram han akon isisiring. Bata la ako.’ Pero hi Jehova nagsiring: ‘Ayaw kahadlok. Bubuligan ko ikaw.’

 Salit nagtikang hi Jeremias ha pagsumat ha mga tawo nga sisirotan hira kon diri hira magbag-o. Ha imo hunahuna, ginsunod ba han mga tawo hi Jeremias?— Waray. Gintinawaan lugod hiya o nasina gud hira ha iya. Karuyag pa ngani han iba nga patayon hiya! Ano daw la an gin-abat ni Jeremias?— Nahadlok hiya ngan nagsiring: ‘Diri na gud ako mag-iistorya mahitungod kan Jehova.’ Pero ito gud ba an iya ginbuhat?— Diri. Hinigugma gud niya hi Jehova salit diri niya mailob nga diri mag-istorya mahitungod ha Iya. Ngan tungod kay waray umundang hi Jeremias, padayon nga ginbuligan hiya ni Jehova.

Pananglitan, iginhulog hi Jeremias han pipira nga kalalakin-an ha hilarom nga buho nga puno hin lapok. Waray hiya pagkaon o tubig. Karuyag hito nga kalalakin-an nga mamatay hi Jeremias didto. Pero ginbuligan hiya ni Jehova, salit natalwas hiya!

Ano an imo mahibabaroan mahitungod kan Jeremias?— Bisan kon danay nahahadlok hiya, waray hiya umundang pag-istorya mahitungod kan Jehova. Kon nag-iistorya ka mahitungod kan Jehova, bangin pagtinawaan ka han mga tawo o masina hira ha imo. Bangin maalohan ka o mahadlok pa ngani. Kondi ayaw gud pag-undang ha pag-istorya mahitungod kan Jehova. Bubuligan ka niya pirme, pariho kan Jeremias.