Nuu tiru runi burla binni laanu o ridxiichicaʼ ora guinínenu laacaʼ de Jiobá. Cadi dxandíʼ nabé feu modo runi sentirnu ora gúnicabe laanu zacá la? Zándaca guiníʼ íquenu: «Maʼ qué zanieruáʼ de Jiobá». Ñee huaníʼ íqueluʼ zacá la?... Biblia ruzeeteʼ historia stiʼ ti hombre gunnaxhii Jiobá, peru bilá nusaana de niníʼ de laabe. Hombre riʼ nga Jeremías. Guidúʼyanu xi bizaacabe.

Dxi nahuiiniʼ Jeremías gudxi Jiobá laa guni ti dxiiñaʼ nabé risaca. Naquiiñeʼ gábibe binni gusaana de guni cosa malu. Cumu nabé nagana ni chigúnibe riʼ la? bidxíbibe. Ngue runi, gúdxibe Jiobá: «Nahuiineruáʼ ne qué gannaʼ xi gabeʼ laacabe». Peru bicabi Jiobá laabe: «Cadi guidxiʼbuʼ, naa zacaniáʼ lii».

 Oraqueruʼ bizulú Jeremías gudxi ca binni que: «Zaca castigartu pa qué guchaatu modo laatu». Ñee bilabi ca binni que laabe la?... Coʼ, nuu tu biʼniʼ burla laabe ne nuu tu bidxiichiné laabe. ¡Xcaadxi dede gucaláʼdxicaʼ ñuuticaʼ laabe! Ximodo raʼbuʼ biʼniʼ sentir Jeremías yaʼ... Nabé bidxíbibe ne guniʼbe: «Maʼ qué zanieruáʼ de Jiobá». Peru, ñee dxandíʼ maʼ qué niniʼbe de Jiobá la?... Coʼ, cadi dxandíʼ diʼ. Cumu nabé nadxii Jeremías Jiobá la? qué ñanda nusaana de niníʼ de laabe. Qué ñaanadxibe, ngue runi gupa Jiobá laabe de ca xhenemígube.

Casi ti biaje la? bisaba caadxi hombre nabé malu Jeremías ndaaniʼ ti bizé nabé gueteʼ. Cumu daʼ beñe ndaaniʼ bizé que la? ngue runi cadaabi Jeremías raqué, ne ni jma triste nga gastiʼ ni gobe nin nisa guebe. ¡Ni gucalaʼdxiʼ ca hombre que nga ñátibe! Peru, ñee guti Jeremías la? Coʼ, purtiʼ biseendaʼ Jiobá tu chindee laabe ndaaniʼ bizé que.

Lu historia riʼ maʼ bidúʼyanu qué nusaana Jeremías de niníʼ de Jiobá, neca guyuu ora bidxibi. Xi zanda guiziidiluʼ de ejemplu stibe yaʼ... Zándaca ziuu binni guni burla lii o guidxiichiné lii ora guiníʼneluʼ laacaʼ de Dios. O dede guituí luluʼ o guidxíbiluʼ. Peru qué chuʼ dxi gusaana de guiniʼluʼ de Jiobá. Bietenalaʼdxiʼ, qué zusaana de gacanebe lii, casi gucanebe Jeremías.