Hiɗon sikkude ɗoftagol mawɓe mon ɓen saa’iiji ɗin fow no weli fii ? — Wonnde no satti. Hiɗon anndi annabi Iisaa ɗoftino Yahuwah e mawɓe makko ɓen ? — Misal makko ngal wallay on no ɗoftoroɗon mawɓe mon ɓen hay si no sattani on. Ɓeyɗen anndugol ɗun.

Ado yo annabi Iisaa arude e oo aduna, hari himo wondi e Yahuwah ka kammu. Kono annabi Iisaa wonduno kadi e mawɓe makko ɓen e hoore ndii leydi. Mawɓe makko ɓen ko Yuusufu e Mariama ɓe innetenoo. Hiɗon anndi honno ɓe woniri mawɓe makko ? —

Yahuwah ƴetti wonkii annabi Iisaa kin, gila ka kammu o waɗi ki ka nder reedu Mariama fii yo o jibin annabi Iisaa o wuura hoore ndii leydi. Ko e hoore mbawgal Allah ngal ɗun waɗiri. Annabi Iisaa njanɗi ka nder reedu Mariama wano boobooɓe ɓen fow njanɗirta non ka nder reedu neene maɓɓe. Ko hewti wa lebbi jeenay, annabi Iisaa jibina. Ko non Mariama e moodi makko Yuusufu, woniri mawɓe makko ɓen e hoore ndii leydi.

Fewndo ko annabi Iisaa heɓi duuɓi sappo e ɗiɗi, o waɗuno goɗɗun ko holli himo yiɗi Yahuwah. Ɗun waɗuno fewndo ko o yaadunoo e mawɓe makko ɓen Yerusalaam fii juldeere Yawtaneede nden. Yuusufu e Mariama ko artata, ɓe yi’aano annabi Iisaa. Hiɗon anndi honto o wonunoo ? —

Yuusufu e Mariama hawji yiltitagol Yerusalaam. Ɓe ɗaɓituno mo nokkeeli ɗin fow. Ɓe maapino ɓayri ɓe yi’aali mo. Kono balɗe tati feƴƴuno si ɓe yiiti mo ka nder juulirde. Hiɗon anndi fii honɗun annabi Iisaa wonannoo ka nder juulirde ? — Ɓayri ko ton o waawaynoo wonude o jannga, o annda fii Yahuwah. Himo yiɗunoo Yahuwah e himo faalanoo janngude, o annda honno o weltinta mo. Hay ko o njanɗi o woni gorko, annabi Iisaa ɗoftino saa’iiji ɗin fow. Annabi Iisaa ɗoftino fii kala hino sattannoo mo e no wondannoo mo e tampere. Annabi Iisaa ɗoftino Yuusufu e Mariama ? — Ko goonga, Deftere Allah nden wi’i o ɗoftino ɓe.

Ko honɗun misal annabi Iisaa ngal janni on ? — Hiɗon haani ɗoftaade mawɓe mon ɓen hay si no sattani on wonnde. On waaway waɗude ɗun ? —