Waswe, iu evritaem obeyim mami and dadi?— Samfala taem hem no isi, iaman? Iu savve hu nao Jesus obeyim?— Hem obeyim mami and dadi bilong hem, and Jehovah. Example bilong hem savve helpem iu for obeyim mami and dadi, nomata maet hem no isi. Distaem bae iumi storyim gudfala example bilong Jesus.

Bifor Jesus kam long earth, hem stap long heven witim Dadi bilong hem Jehovah. Bat Jesus garem dadi and mami long earth tu. Nem bilong tufala hem Joseph and Mary. Iu savve hao nao gogo tufala kamap dadi and mami bilong Jesus?—

Jehovah duim wanfala mirakol for mekem Jesus wea stap long heven for kamap baby wea grow insaed bele bilong Mary, olsem evri nara baby grow insaed bele bilong mami bilong olketa. Bihaen naenfala month, Jesus hem born. Hem nao hao Mary and Joseph kamap mami and dadi bilong Jesus long earth.

Taem Jesus hem 12 year nomoa, hem duim samting wea showimaot hem barava lovem Dadi bilong hem Jehovah. Datwan happen taem Jesus go witim famili bilong hem long Jerusalem for celebratem Pasova. Taem famili gogo bak long ples bilong olketa, Joseph and Mary lukaotem Jesus. Iu savve wea nao Jesus hem go?—

Joseph and Mary kwiktaem go bak long Jerusalem and lukaotem Jesus long evri ples. Tufala no savve faendem hem, and datwan mekem tufala wari fogud. Bat bihaen thrifala day, tufala faendem hem long temple! Waswe, iu savve why nao Jesus go long temple?— Bikos hem savve lane abaotem Dadi bilong hem Jehovah long there. Hem lovem Jehovah and hem laek for savve wanem nao hem mas duim for mekem Jehovah hapi. Jesus hem evritaem obeyim Jehovah start from taem hem smol go kasem taem hem big. Jesus hem obey nomata long taem wea hem no isi, and nomata hem mas safa. Waswe, Jesus obeyim Joseph and Mary tu?— Ia, Bible sei hem obeyim tufala.

Wanem nao iu savve lanem from example bilong Jesus?— Iu mas obeyim dadi and mami nomata long taem wea hem no isi. Waswe, bae iu duim datwan?—