Ncuuba na ciindi coonse kuswiilila bazyali bako?— Cimwi ciindi nkuyumu. Ulizi na kuti mbaani Jesu mbaakali kuswiilila?— Wakali kuswiilila Jehova abazyali bakwe. Cikozyano cakwe cilakonzya kukugwasya kuti uswiilile bazyali bako nikuba cimwi ciindi kakuli kuyumu kucita oobo. Atwiiye zyiingi atalaa zeezi.

Katanazaa nyika, Jesu wakalaa wisi, Jehova kujulu. Pesi Jesu wakalaa bazyali aano aanyika. Bakali baJosefa aMariya. Ulizi na kuti bakaba bazyali bakwe biyeni?—

Jehova wakacita maleele kuti Jesu akomene kali mwida lyaMariya mbuli mbubakomena bana boonse. Musulaa myeezi iili musanu ayine, Jesu wakali kuyoozyalwaa nyika. Eezi nzizyo nzyakapa kuti Mariya amulumaakwe Josefa babe bazyali baJesu aanyika.

Ciindi Jesu nakalaa minyaka iili 12 yakuzyalwa, wakacita cimwi cintu cakatondezya kuti wakali kuyanda Wisi, Jehova. Eezi zyakacitika ciindi Jesu abamumpuli yakwe nobakalaa lweendo lulamfu loko lwakuya kuJerusalemu kuPasika. Pasika lyakali pobwe aawo baIsrayeli nibakali kuyeeya kufutulwa kwabo kuzwa kuEgepita. Nibakali kubweda kumuunzi, Josefa aMariya bakamubula Jesu. Ulizi na kuti wakali kuli?—

Josefa aMariya bakabweda cakufwambana kabaya kuJerusalemu kukuyanduula Jesu koonse-koonse. Bakakatazikana nkaambo bakali mubulide. Nikwakiinda mazuba aatatu, bakakumujana mutempele! Ulizi na kuti nkamboonzi Jesu ncaakali kutempele?— Nkaambo nkuko nkwaakali kukonzya kwiiya atalaa Wisi, Jehova. Wakali kuyanda Jehova alimwi wakali kuyanda kwiiya kuti kujana wamubotezya biyeni. Nikuba muciindi naakali waba mwaalumi, Jesu wakali kuswiilila Jehova ciindi coonse. Jesu wakaswiilila nikuba kuciindi nikwakali kuyumu kucita oobo, alimwi nikuba kuti zyakali kwaamba kuti wakali kuyoopenzegwa. Ino Jesu wakabaswiilila na abalabo baJosefa aMariya?— IBbaibbele lyaamba kuti wakabaswiilila.

Wiiyaanzi kuzwa kucikozyanyo caJesu?— Weelede kunooswiilila bazyali bako, nikuba cimwi ciindi kakuli kuyumu kucita oobo. Uyoocita oobo na?—