Weyo onowawoona alobwana aba vafotoni?— Aweneya baba Mateu, Marko, Luka, Joau, Pedro, Tiago, Juda, na Paulo. Alobwana aba otene akalilewo nsaka na Yezu, vina awene ahileba modheela egumi ya Yezu. Ndowe nisunze modheela awene.

Mwa abene araru alebile mwaha wa egumi ya Yezu aali arumiwi. Weyo onimuziwavo ani mwa aba araru?— Mateu, Joau, vamodha na Pedro. Arumiwi Mateu, na Joau aahimuziwa deretu Yezu, vina kadda muttu wa awene  ohileba nivuru modheela egumi ya Yezu. Murumiwi Joau vina ohileba nivuru ninziwiwa na Ovuhulela, vina makarta mararu antxemerhiwa Joau Woroma, Joau Wanawili, vina Joau Waneraru. Murumiwi Pedro olebile manivuru meeli ali Mbibiliani. Aboya antxemerhiwa Pedro Woroma, vina Pedro Wanawili. Mwari mwa karta yaye yanawili, Pedro olebile sabwa ya nsaka nalogile Yehova wirimu mwaha wa Yezu: ‘Oddu ddi mwanaga. Miyo ddinomukwela, vina miyo ddinomurumeela iyene.’

Alobwana eena vafotoni vina anonisunziha mwaha wa Yezu modheela manivuru alebile awene. Mmodhaya ddi Marko. Iyene txino wali venevale mudhidhi wattiddiwe Yezu vina wahoona dhetedhene dhapadduwile. Mwinaya ddi Luka. Iyene wali n’anga vina txino ohidha okala Mukristu Yezu bakwile.

Anamaleba eena eeli a Bibilia anawoona weyo vafotoni aali abali ang’onoya opitta Yezu. Weyo onoziwa mazina awa?— Mazina awa aali Tiago na Juda. Vamaromo, awene kamurumeela Yezu. Awene ahifiyedha wubuwela wi iyene wali ninga zimorha. Mbwenye vasogorhova awene ahirumeela onfara Yezu vina ahidha okala Akristu.

Namaleba Bibilia womariha onimoona weyo vafotoni ddi Paulo. Ahinatti okala Mukristu, nzina naye wali Saulo. Iyene wanawidda Akristu vina wankaana owali vaddiddi na awene. Weyo onoziwa emukosihile Paulo ofiyedha ofuna okala Mukristu?— Labo nimodha, Paulo wakosa oleddo mudila venevo iyene morurumutxa wahimwiwa muttu bagaloga na iyene odheela wirimu. Oddo wali Yezu! Iyene wahinvuza Paulo: ‘Weyo onkaanelani owali na abale anddiroromela?’ Mumalelani esodha, Paulo wahisaddula makalelo aye vina wahidha okala Mukristu. Paulo ohileba manivuru 14 ali Mbibiliani, Akadda Roma mpaka Ahebreu.

Iyo ninomwengesaga Bibilia labo na labo, kahiyo mwenemo?— Modheela omwengesa Bibilia, iyo ninosunza dhilobo dhinji modheele Yezu. Weyo ogahiziveliwa osunza venjivene mwaha wa Yezu?—